Santiago eguna ospatzen ari dira gasteiztarrak orduotan, Gasteizko Andre Maria Zuriaren jaien atarikoa. Goizetik hasi dira kaleak eta jai guneak betetzen, eguraldi freskoa lagun. Lehen ordutik dozenaka lagun hurbildu dira berakatzak erostera; eta goizak aurrera egin ahala joan dira blusen eta nesken kuadrillak elkartzen, egun nagusia ospatzeko. Unibertsitate campusean, berriz, nekazarien eta abeltzainen azoka tradizionala zabaldu dute, 10:00etan, eta herrialdeko erlezainak dira gune horretan protagonistak.
Eguerdi partean, upelen lasterketaren ostean, Foru plazara hurbildu dira gasteiztar asko kuadrillen arteko herri kirolen txapelketa ikusteko. Halaber, 12:00etan, lagun ugari bildu dira neska eta blusen kuadrillek euskal presoen senideei eginiko omenaldian parte hartzeko. Arratsaldean, kuadrillen kalejirak eta txarangak izan dira protagonistak.
Argazkiak: PHOT.OK
