Martxan dira Gasteizko Txosnak muntatzeko lanak

Hiru egun falta dira jaiak hasteko. Gasteizko Txosnak muntatzen hasi dira gaur, eta abuztuaren 4an, ostegunean, 21:30ean irekiko dituzte txosnaguneko ateak. Aurtengo Txosnisaria Mirentxin Gidariak kolektiboari emango diote.

Atzera-kontaketa amaitzear da. Pandemiaren ondorioz, hiru urte dira jada Gasteizko Txosnak azken aldiz ireki zirenetik, eta ostegun honetatik aurrera, abuztuaren 4tik 9ra bitartean, Gasteizko jaietan herri mugimenduaren, ospakizunaren eta aldarrikapenaren topagune izango dira berriz ere.

Sei egun, zortzi txosna, hiru karpa, lau oholtza eta 38 kontzertu izango dira aurten EHUren Gasteizko Campuseko txosnagunean. Tranbiaren obren eraginez, hainbat aldaketa egin behar izan dituzte, zenbait espazio birmoldatuz. Gaur goizean muntaiari ekin diote Txosna Batzordeak eta txosna jarriko duten kolektiboek. Horrekin batera, azken xehetasunen berri eman dute.

Txosnisaria: Mirentxin Gidariak

Lehenik eta behin, Gasteizko Txosnek iragarri dute aurtengo txosnisaria duela hilabete gutxi bere ibilbideari amaiera eman dion Mirentxin Gidariak kolektiboarentzat izango dela. Euskal presoen senideak kartzeletara eramaten zituen gidari taldeak txosnen inaugurazio ekitaldian jasoko du aitortza, ostegunean, hilaren 4an, 21:30ean; aurretik, 20:30ean, Broken Brothers Brass Band taldearen soinuekin kalejira bat egingo dute, Kutxi kaletik txosnaguneraino.

"Mirentxineko furgonetetan urte hauetan guztietan argi izan dute protagonista nagusiak presoen senide eta lagunak direla. Baina orain, milaka maitasun kilometroren ostean, eragile honi ere eskerrik asko esateko ordua dela uste dugu. Gasteizko Txosnetan ez dugu bisitarik gabeko presorik nahi, ez; presorik gabeko txosnagunea nahi dugu, eta hala aldarrikatuko dugu abuztuaren 5eko kalejiran eta Elkartasun Eguneko egitarauan", adierazi dute Gasteizko Txosnen bozeramaileek.

Abuztuaren 8an, Entxosnatu Eguna

Txupinazoaren egunaren ostean, egun bakoitzak izaera propio eta berezia izango du: hilaren 5ean, ostiralean, Elkartasun Eguna ospatuko dute; larunbatean, hilaren 6an, Ikasle Egunaren txanda izango da, eta igandean, hilaren 7an, Gazte Egunarena.

Abuztuaren 8an, astelehenean, Entxosnatu Eguna ospatuko dute, Gasteizko Txosnen egunik bereziena: "Bi urteko etenaldiaren ostean, kolektibo zein norbanako oro berrelkartzeko aukera paregabea izango dugu", aldarrikatu dute. Nobedade gisa, Alde Zaharrean ospatuko da aurten: 12:00etan hasiko da Irrien Lagunak ikuskizunarekin; horren ostean, marianitada musikatua eta herri bazkaria egingo dute, Arabako produktu ekologikoekin; Txan Magoaren ikuskizunaren ostean, txosnibusa abiatuko da Gasteizko Campusera, bertan txosnaguneaz gozatzen jarraitzeko.

Eraso matxisten aurka

Jai eredu "euskaldun, anitz, parte-hartzaile eta herrikoiaren" aldeko apustua berretsi dute Gasteizko Txosnek. Zentzu horretan, beste neurri batzuen artean, txosnagunea "eraso matxistarik gabeko espazioa" izatea nahi dute. Horregatik, Txosna Batzordeak bat egin du Gasteizko Mugimendu Feministaren eraso matxisten aurkako protokoloarekin, eta hura aktibatzeko mekanismoak prest daudela azpimarratu dute.

Horrekin batera, Mugimendu Feministak erasoak salatzeko 747 41 48 34 telefono zenbakia aktibo izango du jai guztietan zehar. "Behar izatekotan, hau erabiltzeko deia egiten dugu", eskatu dute Gasteizko Txosnek.

Jasangarritasuna

Azkenik, jai eredu jasangarriago bat lortzeko helburuarekin, ohi bezala, txosnagune osoan edalontzi berrerabilgarri eta birziklagarriak baino ez dira egongo.

Gainera, aurten produktu ekologikoen eta elikadura subiranotasunaren aldeko apustua egin nahi izan du Txosna Batzordeak. Horregatik, besteak beste, Herrizoma Elikadura Sarearen garagardoa dastatzeko aukera egongo da.

MAPA

PROGRAMAZIO OSOA

Abuztuak 4 osteguna - Txupinazoaren eguna
20:30 Broken Brothers Brass Band taldearekin kalejira, Kutxitik txosnagunera
21:30 Inaugurazio ekitaldia eta txosnisaria
22:00 Kontzertuak
  • Ibil Bedi (Pop-rock — Nafarroa)
  • Vulk (Post-punk — Bilbo)
  • Willis Drummond (Rock — Baiona - Lapurdi)
  • Aiaraldeko Sound System (Dub soinu sistema — Aiaraldea)
Abuztuak 5, ostirala - Elkartasun eguna
15:00 Herri bazkaria (Landatxo kiroldegian)
20:00 Presoen eskubideen aldeko elkarretaratzea (Andre Maria Zuriaren plazan)
20:30 Kalejira (Andre Maria Zuriaren plazatik txosnagunera)
21:00 Ekitaldia (Eszenatokian)
22:00 Kontzertuak
  • Nhil (Pop-funk — Aretxabaleta - Gipuzkoa)
  • Tremenda Jauria (Kunbia, rap, reggaetoia eta elektronika — Madril)
  • Sara Hebe (Hip hop — Argentina)
  • DJ Pezon (Mamarratxismoa)
Abuztuak 6, larunbata - Ikasle eguna
14:00 Ikasle bazkaria (Entxosnatu Karpan)
16:00 Bazkalosteko jolasaldia (Entxosnatu Karpan)
00:00 Ekitaldia (Eszenatokian)
22:00 Kontzertuak:
  • Zetalau (Punk & Roll — Uribe Kosta - Bizkaia)
  • Garilak 26 (Pop, rock eta erromeria — Bizkaia)
  • DJ Malandro (Parranda & Bitzio — Gasteiz)

Abuztuak 7, igandea - Gazte eguna
14:30 Gazte bazkaria (Gazte Karpan)
23:30 Ekitaldia(Eszenatokian)
22:00 Kontzertuak:
  • Tatxers (Punk, mod, oi! eta pop — Iruñea - Nafarroa)
  • Brigade Loco (Punk-rock eta oi! — Bergara)
  • Rotten XIII (Punk rock — Tafalla)
  • DJ Skarolo (Bitsa-jaia Entxosnatu Karpan)

Abuztuak 8, astelehena - Entxosnazio eguna
12:00 Irrien Lagunak ikuskizuna (Alde Zaharrean)
13:00 Marianitada musikatua (Alde Zaharrean)
14:30 Herri bazkaria (Alde Zaharrean)
16:00 Txan Magoaren ikuskizuna (Alde Zaharrean)
19:00 Txosnibusa (Hala Bedi Tabernatik txosnagunera)
22:00 Kontzertuak:
  • Sua (Pop-rock — Jatabe - Bizkaia)
  • Soziedad Alkoholika (Trash metal, hardcore eta punk — Gasteiz)
  • DJ Bihotza (Elektronika soziala — Gasteiz)
  • DJ Villatekk (Tekkno, Dark, Industrial, Hard— Gasteiz)
  • DJ Sudo
Abuztuak 9, asteartea
22:00 Kontzertuak:
  • Herenegun (Ska eta reggae — Donostia)
  • Zetak (Pop elektronikoa — Arbizu - Nafarroa)
  • Dupla (Musika urbanoa — Agurain)
  • DJ Ordezkagune
  • DJ Dantzetan Jarrai

GAZTE KARPA

Gasteizko Txosnen barruan, Gazte Karpa ere bueltan izango da aurten, askotariko kontzertu eta jarduerekin. Abuztuaren 4tik 9ra bitartean, askotariko jarduerak, kontzertuak eta pintxadak izango dira bertan. Besteak beste, Worth It, Ziztada & Rlantz, Dena, Feline, Sutan Klan, Odei Barroso eta Morti Jaleo izango dira oholtza gainean:

Erlazionatuak

"Saretzeko falta sumatu dugu; orain bai, gure momentua da"

Gasteiz

Txosna gunerik gabe bi urtez izan eta gero, "berebiziko ilusioa" dute txosnetako kideek jaiak elkarrekin ospatzeko. Azken prestakuntza lanetan dabi...
Gasteiz, jaiak hasteko egarriz

Gasteiz

400 ekitaldi baino gehiago izango dira aurten Gasteizko jaietan. Besteak beste, dozenaka kontzertu izango dira Foru plazan, Aihotz plazan, Arka pla...
Gasteizko Txosnak, hiru urteren ostean indarberrituta

Gasteiz

Bederatzi egun baino ez dira falta Gasteizko Txosnak berriz ere zabalik ikusteko. 42 urtez proiektua posible egin duten eragile zein norbanakoen la...
Gazte Karpa ere bueltan izango da aurten, askotariko kontzertu eta jarduerekin

Gasteiz

Abuztuaren 4tik 9ra bitartean, askotariko jarduerak, kontzertuak eta pintxadak izango dira Gasteizko Txosnetako Gazte Karpan. Besteak beste, Worth ...
Gasteizko Txosnek eta ALEAk elkarlanean aritzeko asmoa berretsi dute

Gasteiz

Arabako ALEAk, bere ibilbidea hasi zuenetik, argi izan du lurraldeko eragile ezberdinen bozgorailu lana egiteko hedabidea izan nahi duela, irekia e...
Soziedad Alkoholika eta Vulk taldeek itxi dute Gasteizko Txosnetako programazioa

Gasteiz

Gasteizko Txosnek abuztuaren 4tik 9ra bitarteko programazioa aurkeztu dute. Soziedad Alkoholika, Vulk eta Herenegun taldeen kontzertuak iragarrita,...

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide