Denboralditik kanpo ere, futbolak hartuko du protagonismoa Gasteizko jaietan. Izan ere, gaur goizean ezagutarazi da Arabako Garrasia, Alaves eta Gloriosas taldeetako ordezkariek jaurtiko dutela aurtengo Gasteizko jaietako txupinazoa. EH Bilduri zegokion aurten aukeraketa, eta erabakiaren berri eman dute gaur, San Migel balkoian bertan.
Gloriosas taldearen izenean, Eider Egaña egongo da. Alaves taldearen izenean, Victor Laguardia jokalaria. Arabako Garrasiak taldearen izenean, berriz, Leire Ruiz de Apodaka, Raul Corralejo eta Aratz Corralejo. "Azken urteetako ahaleginak eta lorpenak aitortzeko asmoz, EH Bilduk Alaveseko jokalariak eta zaleak omendu nahi ditu, aurtengo jaietako txupinazoa jaurtitzen utziz. Horrela, egindako lana eta erakutsitako jarrera aitortu nahi dizuegu, lan nekaezinaren adibide izan zaretelako eta gasteiztarrengan piztu duzuen ilusioa azaltzeko nahi beste hitzik ez dagoelako", adierazi du Rocio Vitero EH Bilduren Gasteizko bozeramaileak.
