Apirilaren 21ean izango dira Eusko Legebiltzarrerako hauteskundeak, eta pixkanaka argitzen joan dira alderdi nagusien apustuak. Dagoeneko beren zerrendaburuak aurkeztu dituzte EAJk, EH Bilduk, PSEk, PPk, Elkarrekin Podemosek eta Sumar koalizioak. Horietako batzuk zerrendak osatzen ari dira oraindik, baina gutxienez mahai gainean daude hautagai nagusiak.
Podemosekin batera ez aurkezteko erabakiaren ostean, bere Arabako zerrendaburua aurkezten azkena izan da Sumar koalizioa. Jon Hernandez Hidalgo (Irun, 1978) gipuzkoarra izango da Yolanda Diaz buru duen alderdiaren hautagai nagusia Araban. Sumar Mugimenduaren EAEko hirukotea osatuko du Hernandezek, Alba Garcia (Bizkaia) eta Andeka Larrearekin (Gipuzkoa) batera.
2013tik Euskadiko Partidu Komunistaren (PCE-EPK) idazkari nagusia da EAEn. Horrez gain, Ezker Anitza - IU koalizioko kidea, Espainiako III. Errepublikaren aldeko militantea eta CCOO sindikatuko afiliatua da ere. 2016ko Eusko Legebiltzarrerako hauteskundeetan, Gipuzkoako diputatu hautatu zuten, eta Elkarrekin Podemos koalizioaren barruan aritu zen 2020ra arte. Deustuko Unibertsitate pribatuan ikasi zuen, eta 2001etik Historian lizentziatua da.
Zeintzuk dira Arabako zerrendaburu nagusiak?
- EAJ: Joseba Diez Antxustegi (EAJren zerrenda osoa hemen)
- EH Bildu: Pello Otxandiano Kanpo (EH Bilduren zerrenda osoa hemen)
- PSE: Aroa Jilete (PSE-EEren zerrenda osoa hemen)
- PP: Javier de Andres
- Elkarrekin Podemos: Juantxo Lopez de Uralde
- Sumar: Jon Hernandez