PSE-EEk Eusko Legebiltzarrerako hauteskundeetarako hautagaien zerrenda osoa aurkeztu du. Joan den astean aurreratutakoari jarraiki, Jaurlaritzan Turismo zuzendari diharduen Aroa Jilete (Gasteiz, 1992) izango da PSE-EEk Arabako zerrendaburua. Javier Hurtado eta Maria Jesus San Jose joango dira bigarren eta hirugarren postuan.
PSE-EEren lurraldeetako batzorde exekutiboek hautagaien zerrendak onartu ostean, hilaren 19n biltzekoa den EAEko Zerrenden Batzordeak berretsi beharko ditu proposamenak, eta 20an alderdiaren Espainiako Batzordeak onartu beharko ditu ere. Handik aurrera, "organo federalek" azken oniritzia eman beharko dute. Halere, hedabideei helarazitako ohar batean alderdiak behin betikotzat eman ditu aurkeztutako zerrendak, eta nabarmendu du "Batzorde Nazionalak berretsiko" dituela.
Alderdiaren esanetan, "berrikuntza sakona" egin dute zerrendetan. Izan ere, Jilete ez da izango zerrendaburu berri bakarra. Bizkaiko zerrendak alderdiaren egungo idazkari nagusi Eneko Andueza izango du lehen postuan —lehendakarigaia izango da— eta Gizpukoatik Espainiako Gobernuak EAEn duen ordezkari Denis Itxaso joango da buru.
Jilete Politika Zientzietan graduatua da, eta, PSE-EEk bidalitako informazioaren zein Irekian agertzen den curriculumaren arabera, politika izan du beti ogibide. Besteak beste, Europako Parlamentuan Jaurlaritzaren laguntzailea izan da, Eltziegon zinegotzi izandakoa da, Batzar Nagusietan batzarkide, Lakuako Turismo saileko kabinete zuzendari eta, azkenik, Turismo eta Ostalaritzako zuzendaria, Lakuan.
Hauek dira Arabarako hautagai guztiak:
- Aroa Jilete. Turismo eta Ostalaritza zuzendaria Jaurlaritzan
- Javier Hurtado. Turismo sailburua
- Maria Jesus San Jose. Legebiltzarkidea
- Alberto Alonso. Legebiltzarkidea
- Estibaliz Canto. Arabako Batzarkidea
- Adrian Fernandez. Turismo saileko aholkularia
- Maria Ibañez. Zinegotzia Eltziegon eta mahastizaina
- Jorge Juez. Administraria
- Susana Pavon. Administraria
- Dario Ocio. Zinegotzia Zanbranan
- Laura Fernandez
- Diego Ochoa de Aspuru
- Saioa Beistegui
- Roberto Atienza
- Itxiar Oribe
- Javier Entrena
- Irantzu Mateos
- Miguel Martin
- Nagore Gutierrez
- Natxo Saenz
- Soukeina Ahmed Zeine Ely Salem
- Oscar Layana
- Eva Aisa
- Raquel Zabala
- Txarli Prieto
