Mugarik Gabeko Musikariak erakundeko presidente Jesus Mari Alegria Pinttuk egindako proposamen bati jarraiki, Urrezko Zeledonak elkarteak Kubaraino eraman du Zeledon. Jaien atarian gauden honetan, bideo bat zabaldu dute Kuban grabatutako abestiarekin. Bertako Ismaelillo taldearen esku egon da Alegriak idatzitako hitzak musikara eramatea.
"Uste dugu Zeledon dela hiriko irudirik maitatuena, eta jadanik ozeanoz beste aldean ere abesten diote bihotzez", nabarmendu du elkarteak ohar txiki batean.
Gazteleraz dago kanta, eta Karibean ohikoak diren hainbat erritmo eta dantza jaso dituzte abestian zein bideoklipean.
Besteak beste, Guantanamera ospetsuaren aldaera txikia sartu dute. Horretan, "palmeren lurraldeari" ongi etorria ematen diote Zeledoni. Hori ez ezik, txa-txa-txa erritmoan gozatzera gonbidatu dute vacilón omen den Gasteizko jaietako pertsonaia. Ikusteko dago ea aurten aterkia utzi ostean dantza horrekin ausartuko den Zalduondoko baserritarra.