Hilabete pasatxo baino ez da falta Gasteizko jaietarako, eta gaur bertan segurtasun plan berezia koordinatzeko bildu dira Udala, Udaltzaingoa eta Ertzaintza. Erabakitako neurrien artean, Andre Mari Zuriaren plaza itxiko dute abuztuaren 4an, txupinazoan eta Zeledonen jaitsieran beirarik ez sartzeko.
2019an izan zen azken txupinazoa, bere ohiko formatuan behintzat. Nolanahi ere, beira sartzeko debekua 2017tik dago indarrean, bertan milaka herritar bilduko direla kontuan hartuta, hautsitako botilek eta ontziek eragin ditzaketen zauriak eta ebakiak direla eta. Sarbideak ixteko protokoloa, berriz, 2019an ezarri zen, eta orduan erabilitako plan bera da aurten erabiliko dena.
Plaza ixteaz gain, hamar sarbide-kontrol jarriko dituzte, eta soilik horietatik sartu ahal izango da plazara: Hedegile kaletik, Zapatari kaletik, Errementari kaletik, Probintzia plazatik, Prado kaletik, Dato kaletik, Posta kaletik, Olagibel kaletik, San Frantzisko aldapatik eta Loma Jeneralaren plazatik.
Delituak eta sexu erasoak
Txupinazorako segurtasun planarekin batera, Udaltzaingoa eta Ertzaintza elkarlanean arituko dira jaietan zehar. Besteak beste, kaleko presentzia areagotuko dute, eta Ertzaintzaren dronak erabiliko dituzte, delituak ekiditeko asmoz.
Arreta berezia jarriko dute sexu askatasunaren aurkako delituen aurka. Jende gehien pilatzen den tokietan, parkeetan eta trenbidearen azpiko pasabideetan zaintza berezia egingo dute, bereziki etxera itzultzeko orduetan.
Gainera, bi poliziek salaketen bulegoa partekatuko dute aurten ere Olagibel kalean, Panticosa eraikineko Ertzaintzaren Herritarren Arretarako Bulegoan. Irekita egongo da uneoro abuztuaren 4ko 7:30etik abuztuaren 10eko 21:30era.