EAJko zerrendaburu Edu Barinagak zinegotzi aktari uko egin dio Arabako Hauteskunde Batzordearen aurrean, eta jada erabakia Bastidako Udalera iritsi da. Hala ziurtatu du Naiz hedabideak. Bere ordez, zerrendako laugarren postuan zegoen Jose Manuel Caño Bilbao izango da jeltzaleen buru Bastidan; hala ere, litekeena da bere burua alkategai gisa ez aurkeztea eta alkatetza PPren esku uztea.
Barinagaren erabakia udal gobernuak osatu baino bi egun lehenago iritsi da; eta Naiz-en arabera, zerikusia du, larunbateko udalbatzari begira, EAJren barruko desadostasunekin.
EITBn egindako adierazpenetan, Barinagak baieztatu du, hain zuzen ere, PPri alkatetza uzteko Araba Buru Batzarraren (ABB) erabakiarekin ados ez zegoelako hartu duela erabakia: "Dimisioaren arrazoia helburuak aldatu direla da", azaldu du. Dimisioak, zalantzak argitzetik urrun, ate guztiak zabalik utzi ditu, Cañoren jarrera ezagutu bitartean: alderdiaren erabakia blindatuko ote du?
Izan ere, ABB alkategairik ez aurkezteko eta PPko Daniel Garcia Ruiz alkatetzara iristen uztearen aldekoa da, alderdi honek eskatzen dion bezala. Herriko sektoreek, aldiz, EH Bildurekin azken lau urteetan egindako akordioarekin jarraitu nahi dute.
EH Bilduk, ostiralean zabaldutako ohar batean, "PP berriro kanporatzeko konpromisoa" berretsi zuen. Leire Garbaio buru duen udal taldeak adierazi zuen "gure esku dagoen guztia" egingo dutela PP "Bastidako udal gobernutik kentzeko".
Saltsa, Arabako Errioxan
PPk giltza du Oionen EH Bilduri (5 zinegotzi) alkatetza kentzeko, bere bi zinegotziek EAJ (3) eta PSEren (2) arteko koalizio gobernua babesten badute; gertagarriena da, hain zuzen ere, hori gertatzea. Bastidan eta Guardian, berriz, EAJk erabaki konplexuagoa hartu beharko du: bere burua alkatetzara aurkeztu eta EH Bilduk bermatutako babesa jasotzea; edo alkategaia aurkezteari uko egin eta, zuzenean, PPren esku uztea.
- Bastida: EH Bilduk, ostiralean zabaldutako ohar batean, "PP berriro kanporatzeko konpromisoa" berretsi du. Leire Garbaio buru duen udal taldeak adierazi du "gure esku dagoen guztia" egingo duela "Alderdi Popularra Bastidako udal gobernutik aldentzeko". Kasu honetan ere, PPk lau zinegotzi ditu, EAJk hiru eta EH Bilduk bi.
- Guardia: EAJren alkategaiak hautagaitza aurkeztuko duela eta EH Bilduren babesa onartuko duela esan du, PPren kritika eta Sabin Etxearen ñabarduren artean. Benetan zer gertatuko den, ordea, datozen egunetan ikusiko da: PPk lau zinegotzi ditu, EAJk hiru eta EH Bilduk bi.
Arabako zein alkatetza daude jokoan?
Larunbat honetan, ekainaren 17an, udal hauteskundeetatik ateratako udalbatzak osatuko dira, baita alkate berriak izendatu ere. Araban zalantzan dauden alkatetzen artean, bat gutxienez argitu du ostegun goizak: EH Bilduk eta Omniak Laudioko udal gobernua osatuko dute datozen lau urteetan, eta zerrenda bozkatueneko zerrendaburu Ainize Gastaka izango da alkate berria.
Guardia, Bastida, Kuartango, Zigoitia, Erriberabeitia, Dulantzi, Aiara eta Arratzua-Ubarrundiako udaletan, besteak beste, edozer gerta daiteke oraindik.
|
|
|
