Korrikaren ibilbidea Aiaraldean, kilometroz kilometro eta eskuz esku

Erabiltzailearen aurpegia Aimar Gutierrez Bidarte 2022ko mar. 30a, 10:30
Lekuko eramaile guztien zerrenda osatu du Aiaraldea Komunikabideak. / AIARALDEA.eus

Korrikaren 22. edizioak eskualdeko errepideak zeharkatuko ditu martxoaren 31an. Erabaki duzue nondik nora korrika egin? Euskararen aldeko ekimenak herriz herri egingo duen ibilbidea eta lekuko-eramaileen zerrenda osatu ditu Aiaraldea Komunikabideak.

Bi egun besterik ez dira falta Korrikaren 22. edizioa Amurriotik abiatzeko. Aiara, Artziniega, Okondo, Laudio, Arakaldo eta Arrankudiaga-Zollo zeharkatuko ditu euskararen aldeko ekimen erraldoiak ostegun arratsaldean. Aiaraldea Komunikabideak ibilbidearen nondik norakoak, ordutegiak eta lekuko-eramaileen zerrenda osatu ditu, udalerriz udalerri.

Amurrio

16:30ean abiatuko da Korrika Amurrioko Juan Urrutia plazatik. AEK-ko euskaltegiko sei irakasleek izango dute lehenengo kilometroan mezu ezkutua daraman lekukoa eusteko ardura.

Aiara

17:22ak aldera Aiaran sartuko da Korrikaren 22. edizioa, Izoriatik hain zuzen. Arespalditza, Ibaguen, Menagarai eta Lanteno ere zeharkatuko ditu bere ibilbidean.

Artziniega

32 kilometro egin ostean Artziniegara iritsiko da Korrika, 18:21ean. Lekukoak alde zaharretik bira bat egingo du Burgos aldera abiatu aurretik.

Okondo

Arratsaldea Bizkaia aldean igaro ostean, 22:19ean itzuliko da berriro ere Korrika eskualdera. Lekukoa, ordea, ez da herrigunetik igaroko, eta Zudubiarte baserrira iristean Garateko mendatera abiatuko da. Dena den, girorik ez da faltako Okondoko erdigunean. Izan ere, 16:30ean Korrika Txikia egingo dute eskolako ikasleek, eta 20:00etan txokolatada antolatu dute jubilatuen lokalean; "Korrikaren itxaronaldia atseginagoa egiteko".

Laudio

86 kilometro egin ostean Laudiora iritsiko da Korrika, 23:05ean. Okondori hartuko dio lekukoa Garateko gainean. Herriguneko hainbat kaleetan barrena igaroko da ibilbidea, baita Herriko Plazaren erditik ere.

Areta, Arakaldo eta Arrankudiaga-Zollo

Laudio atzean utzita, Aiaraldeko azken kilometroei ekingo dio Korrikak. Areta izango du lehen geltokia, eta Arakaldora 23:24ean iritsiko da. Azkenik, Arrankudiaga-Zollotik igaro ostean, datorren ediziora arte agurtuko du eskualdea.

Albiste hau AIARALDEAk argitaratu du eta Creative Commons by-sa lizentziari esker ekarri dugu ALEAra. Jatorrizko albistea hemen duzu osorik ikusgai.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide