Amurrio eta Donostia lotuko ditu 22. Korrikak, 2022ko martxoaren 31tik apirilaren 10era bitartean. "Euskara hitzetik ekintzetara eramateko" asmoz, HitzEkin izan da edizio honetarako aukeratutako leloa, eta kontzeptu horri tiraka sortu dute abestia; horrekin batera, baita bideoklipa ere. Biak ala biak ostegun honetan aurkeztu ditu AEKk, Iruñeko Golem Baiona zinema aretoan.
Kantaren hitzak sortzeko ardura izan du Sustrai Colina bertsolari eta kazetariak; arlo musikala, berriz, Nerea Urbizu musikariak —Katamalo eta Ene Kantak, beste proiektu askoren artean— zuzendu du; azkenik, letra eta instrumentalari ahotsa eman diote Urbizuk berak, Ane Garciak eta Anarik.
Halaber, Urbizu pianoan ere aritu da, eta, jakina, hainbat musikariren ekarpena izan du: Ander Zulaika baterian, Itsaso Etxebeste baxuan eta Eñaut Gaztañaga gitarran. Zestoako Gaztain estudioan grabatu dute abestua, eta Eñaut Gaztañaga arduratu da nahasketaz eta masterizazioaz.
Bideoklipa Euskal Herriko zortzi tokitan grabatu dute, Tripulante Produce ekoiztetxearen, Eymard Uberetagoiena errealizadore eta editorearen, eta Diego Azanza kamerariaren eskutik: Aizarotz, Baiona, Basauri, Baztan, Donostia, Iruñea, Lekunberri eta Ondarroa. Gainera, Lekunberriko Ibarberri eskolako 4. mailako ikasleez eta estra ugariez gain, Itziar Ituño, Ramon Agirre, Ainara Unanua Arizmendi, Mikel Unanua Arizmendi, Omar Diop, Maddi Egiguren, Laia Igerategi, Begoña Ajuria Blanco eta Mikaela Elizalde aktoreek parte hartu dute.
Letra
Honako hauek dira Sustrai Colinak ondutako hitzak:
Hitzak. Hitzekin, hitzekin,
hitzekin, hitzekin, hitzekin...
Oinetakoak lotu, (e)ta utzi oinei libre
belarretan ortozik bilakatzen bide.
Mapetatik harago mundu asko dago,
sentitutakoa, sentitu (e)ta hitzekin.
(E)ta berriro egin korrika zurekin
arantzak erauzteko elkarren ederrez.
(E)ta berriro egin mundua zurekin...
Euripean kantari ibiltzen ikasi
ez egon atertu zain, (e)ta korrika hasi.
Berdin da non hasten den, orain beti da hemen.
Pentsatutakoa, pentsatu (e)ta hitzekin.
(E)ta berriro egin korrika zurekin
arantzak erauzteko elkarren ederrez.
(E)ta berriro egin mundua zurekin
beti baitago norbait hitz ekiteko prest.
Hitzekin, hitzekin, hitzekin, hitzekin...
Neguko eguzkitan erantzi azala;
beti ziur dago(e)nak duda sor dezala.
Bizitza jendea da, (e)ta jendea gara.
Sentitu, pentsatu... Sentitu, pentsatu hitzekin!
Hitz ekin, hitzekin, hitzekin, zurekin...
Hitz ekin, hitzekin, hitzekin, zurekin... Hitzekin.
