Korrikak mundu osoko euskaltzaleak martxan jarri ohi ditu urtero, eta aurten ere Bruselako euskaldunek bat egin dute euskararen aldeko martxarekin. Horretarako, martxoaren 20an egitarau zabala antolatu zuten Belgikako hiriburuko Warandepark (Royal Park) parkean dagoen musika kioskoaren inguruan.
13:00etan elkartu ziren jaialdiari hasiera emateko, eta Korrikako petoak salgai izango zituzten bertan. Jarraian, 13:30ean, Arabako Trebiñu aldean erositako kilometroa korritu zuten. Ondoren, 14:00etan, pintxo-pote euskalduna egin zuten. Parkean lortutako diru guztia kilometroa ordaindu eta AEKri ordaintzeko bideratu dute.
Arratsaldean, 15:30ak aldera, Vlaams Huis tabernara mugitu ziren, bertan Korrika jaiarekin jarraitzeko.
IRUDIAK: Bruselako euskaldun talde bat.