Aitor Zelaia eta Galder Barbado atxilotu dituzte Gasteizen

Aitor Zelaia eta Galder Barbado atxilotu ditu Ertzaintzak, Udaltzaingoaren laguntzarekin, Espainiako Auzitegi Gorenak berretsitako lau urteko kartzela zigorra betearazteko.

17:00ak aldera, bi gazteak Gasteizko Gobernu Militarreko balkoian agertu dira, kamiseta urdinez jantzitako dozenaka gaztek babestuta. Ordu eta erdi inguru eman dute bertan, eta Ertzaintzak eraikina inguratu du, Leizaola plazan gero eta jende gehiago babesa ematera hurbiltzen zen bitartean. Azkenean, ertzain talde bat sartu da eraikinera; gazteak atxilo eraman dituzte eta garajetik atera auto kamuflatu zuri batean. Une honetan, Zaballako espetxean daude jada.

2021ean zigortu zituzten Auzitegi Nazionalean, "helburu terroristekin armak eta lehergaiak gordetzea" egotzita, 2018an Dura herrian agertutako bidoi batekin ustez zerikusia izateagatik. Orduz geroztik, bi urtez izan dira Auzitegi Gorenaren behin betiko erabakiaren zain; maiatzean, epaitegi horrek zigorra berretsi zuen, eta ondoren espetxeratzeko aginduaren zain izan dira beste hainbat hilabetez.

Ordu erdiko atzerapenarekin, 19:00etan Artium Museotik abiatu da ANkerkeriari Stop plataformak bi gazteen askatasunaren alde Euskal Herriak aurrera! lelopean deitutako manifestazio nazionala. Milaka pertsona bildu dira mobilizazioan eta amaierako ekitaldian; besteak beste, Zelaiak eta Barbadok bertan bildutako jendeari zuzendutako bideo bat proiektatu dute.

Argazki galeria

"Elkartasunaren garrantzia"

Atxiloketaren ostean eta ekitaldian ere, Maddalen Muguruza eta Miren Lapitz ANkerkeriari Stop plataformako bozeramaileek hartu dute hitza: "Lehenik eta behin gure besarkadarik handiena bidali nahi diegu Aitor eta Galderri", adierazi dute. "Lau urteko prozesuaren eta itxaronaldiaren ondoren, Aitor eta Galder atxilotuak izan dira. Argi daukagu, aurretik idatzita zegoen gidoi bat jarraitzen duela honek guztiak. Auzitegi Nazionalaren iritziz, euskal militante oro erruduna da, eta militantzia hori zigortzeko bere eskura dituen tresna guztiak erabiltzen ditu".

"Neurrigabekeria honen aurrean, haien askatasuna aldarrikatzen dugu, eta elkartasunaren garrantzia azpimarratzeko elkartu gara gaur Gasteizen. Euskal Herrian horrelako ankerkeriak berriro gerta ez daitezen agertoki baterantz aurrera egiteko", aldarrikatu dute. "Azkenik, eskerrak eman nahi dizkiogu euskal jendarteari, berriz ere injustizia eta ankerkeria ororen gainetik elkartasun uholde bat sortzeagatik. Elkartasuna eta borroka baitira Euskal Herriaren motore aurrera egiteko".