EH Bilduk eta EAJk 27na eserleku lortu dituzte Eusko Legebiltzarrerako hauteskundeetan. Imanol Pradalesena izan da alderdi bozkatuena, baina EH Bildurekin berdinduta. PSE-EEk bi eserleku gehiago lortu ditu hauteskundeetan (12), eta horrenbestez jeltzaleek eta sozialistek gehiengo absolutuari eutsiko diote, eta gobernua berretsi ahalko dute: 39 eserleku batuko dituzte.
EH Bilduk emaitza historikoak izan ditu. Pello Otxandiano lehendakarigaiaren koalizioak orain dela lau urte baino sei eserleku gehiago lortu ditu Eusko Legebiltzarrean, 21etik 27ra pasatuz; eta 340.000 boto inguru lortu ditu, bere historian izan duen emaitzarik onenak.
Javier De Andres buru duen PPk, berriz, lortu du laugarren indarra izateari eustea; 2020ko emaitzak hobetu ditu eta eserleku bat irabazi du. Sumar Mugimenduak, aurrenekoz, Arabako eserleku bat eskuratzea lortu du, eta Voxek Arabako eserlekua atxiki du. Alta, Elkarrekin Podemos Eusko Legebiltzarretik kanpo geratuko da.
Araban, gaueko albistea ere EH Bilduren garaipena izan da, lehen aldiz irabazi baititu hauteskundeak lurraldean. EAJren beherakada ere nabarmentzekoa da. Araban, EH Bilduk 8 eserleku lortu ditu, eta EAJk, berriz, 7.
Parte hartzea %63koa izan da aurtengoan, azken hauteskundeetan baino altuagoa. Orain dela lau urte %50ekoa izan zen, eta 2016an %60koa.