Elkar+ekin dantzan! plataformak martxoaren 20an milaka pertsona dantzan jartzeko helburua du, elkartegintza sustatu eta Elkar+ekin gara! proiektua ezagutarazteko. Horretarako, Mikel Laboaren Martxa baten lehen notak abestia dantzarako moldatu dute Olatz Salvadorrek eta Bihotx taldeak; gainera, Aritz Salamanca dantzari eta koreografoak koordinatu du ekintzaren ildo artistikoa.
50 eta 70 herri artean izango dira egitasmoaren plaza. Tartean, Gasteizko hitzordua 12:30ean Foru plazan izango da.
Aurretik, hainbat bideo plazaratu dituzte, Elkar+ekin gara! egitasmoa azaltzeko eta koreografia irakasteko. Hiru dantza mota prestatu dituzte, baina antolatzaileek azpimarratu dute koreografiei ez zaiela zehatz-mehatz jarraitu behar; bakoitzak "nahi adina" eralda dezake dantza.