Korrikaren historia biltzen duen podcast bat argitaratu du AEK-k, herri ekimenaren historia 22 pilulatan bilduz.
Korrikaren webgunean entzun daitezke saio horiek, Historia izeneko atalean. Naiz irratiarekin elkarlanean egindako proiektua izanik, irrati tradizionalaren bitartez ere entzun ahal izango dela aurreratu dute. Ivoox podcast zerbitzuan eskegitako saioez gain, horien transkripzioak ere eskura jarri dituzte webgunean.
Proiektu handiago baten parte da ekimena. Izan ere, Korrikateka izeneko atal berezi bat prestatu dute webgunean. Diotenez, pixkanaka Korrikari lotutako ondare guztia bertan eskaini nahi dute, hala nola logotipoak, bideoak, abesti ofizialak edota lekuko barruko mezuak.