Ostiralean, hilaren 28an, Uhinak 22. Korrikaren dokumentala aurkeztuko du AEK-k Laudioko Aiaraldea Ekintzen Faktorian. Bertan, dokumentalaren egileak Txakur Gorria sormen kolektiboko kideek hartuko dute hitza, baita Asier Amondo Korrika arduradunak ere; 20:30ean izango da saioa.
"Euskal Herriaren zain eta arteria grisetan barrena abiatu gara eta bederatzi ahots topatu ditugu bide bazterretan. Ahots hauei esker, bederatzi paisaia desberdin ezagutu ditugu: bederatzi errealitate linguistiko eta emozional. Hitzekin jolasteko gonbita egin diegu, eta elkarrekin ekiten jarraitzeko irrika jaso dugu bueltan", azaldu dute dokumentalaren egileek.
Aurkezpenaren ostean, datozen asteotan, hainbat herritan ere Uhinak lanaren emanaldiak programatuko dituzte, eta, era berean, laster, telebista nahiz internet bidez zabalduko da.