Oporraldiaren ostean, iraila ezin okerrago iritsi da Mercedesek Gasteizen duen fabrikara. Iraileko lehenengo astean ekoizpena erabat gelditu behar izan zuen Asiatik inportatutako erdieroaleen hornikuntza falta zela eta. Irailaren 3tik aurrera, malgutasuna ahalbidetzeko hitzarmenean jasotako ordu-poltsa agortuta, indarrean sartu zen zuzendaritzak enpresa batzordearen gehiengoarekin adostutako ABLEEa —abenduaren 31ra bitartean 30 eguneko malgutasuna izateko—. Joan den astean, irailaren 13tik 17ra bitartean ere, ekoizpena hirugarren astez jarraian eten behar izan zuten.
Aste honetarako, ordea, argi izpi txiki bat piztu da mikrotxipen krisiaren iluntasunean: zuzendaritzak joan de asteazkenean iragarri zuen gaur, irailaren 21ean, ekoizpenari berrekiteko erdieroale nahikoak topatu dituela. Hortaz, muntaketa zein pintura lerroen ohiko erritmoa berreskuratuko da eta lanera itzuliko dira Gasteizko fabrikako 5.000 langileak, azpikontratatutako enpresa hornitzaileen artean —600 bat enpresa eta 40.000 langile inguru— ondorioak areagotzen ari diren bitartean.
Hala ere, asteleheneko etenaldia kontuan hartuta, jarduerarik gabeko egunak 28 izango dira 2021ean, gutxienez. Egoeraren ziurgabetasuna dela eta, datozen hilabeteetan enpresak astero aztertuko du ekoizpena gelditu behar ote duen. Ekoizpena gelditzen den egunetan, soldataren %80 jasoko dute langileek.
Horrela, irailaren 3an indarrean sartu zen Aldi Baterako Lan Erregulazio Espedientearen (ABLEE) egoera honako hau izango da: gastatutako lanaldiak hamabi izango dira dagoeneko, eta, beraz, espedientea kontsumitu arte, 18 egun geratuko zaizkie hemendik urte bukaera arte. Krisiari aurre egiteko zuzendaritza aztertzen ari den aukeretako bat da astean lau egunez lan egitea eta beste egun bat ABLEEan sartzea.