Beñat Goitia gasteiztarraren bakarkako proiektu berria da Benizze, bonboak, hi-hat-ak, grabeak, autotune geruza eta euskara oinarri hartuta, musika elektronikoa eta trap zertzeladak uztartuz. "Azken urteak hau bilatzen pasa ditut. Eta azkenean aurkitu dut. Amets asko, ideia ugari eta negar gehiegi", zioen lehen bideoklipa kaleratu aurretik plazaratutako manifestuak.
Ondoren, martxoan, lehen kolpea iritsi zen: Bazatoz. Maiatzean, ALEArekin egindako elkarrizketaren bezperan, bigarrena: Zilarrezko bala. Elkarrizketa horretan, hiru kolaborazio egongo direla aurreratu zuen; horietako bat ekainean iritsi zen: Mamuak eta izozkiak kanta eta bideoklipa, Ruper Ordorika euskal musikariaren ahotsarekin. Laugarren singlearekin, Urrea, intxaurrak eta txanpaina, proiektu berriaren zimenduak berretsi zituen urriaren hasieran. Bosgarren lanarekin, Sua kantarekin, bigarren kolaborazioa eskaini du, J Martina taldearekin eskuz esku.
Beste bi abesti etorriko dira datozen hilabeteetan, horietako bat oso kolaborazio berezia, eta bakoitzak bideoklip batekin iritsiko da. Denak etxean ekoitzita izan dira, eta Bilboko El Tigre Estudios estudioetan gauzatuta, Jon Agirrezabalagaren laguntzarekin produkzioaren orrazketan, ahotsaren grabaketan eta nahasketan; masterizazioa, berriz, Xabier Egiarekin egin du. Aurreikusitakoaren arabera, kanta guztiak argitaratuta daudenean, diskoa atera eta zuzeneko emanaldiei ekingo die gasteiztarrak.
