Klasera itzultzeko asmoa maiatzaren 25era atzeratu du Jaurlaritzak

Hezkuntza komunitatearen arbuioa jaso du egunotan Jaurlaritzaren proposamenak. / GOOGLE MAPS

Aurrez aurreko eskoletara maiatzaren 25etik aurrera itzultzea proposatu du orain Eusko Jaurlaritzak, hezkuntza komunitatearekin "arazo gehiago ez sortzeko" asmoarekin. Sindikatuek "inprobisazioa" leporatu diote.

Eusko Jaurlaritzako bozeramaile Josu Erkorekak gaur eguerdian egindako agerraldian azaldu du Espainiako Gobernuak ez dituela "eragozpen juridikoak" argitu; hortaz, aurrez aurreko eskoletara itzultzeko asmoa astebete atzeratzea erabaki du oraingoan Eusko Jaurlaritzak. Hezkutza sailburu Cristina Uriartek erabakiaren berri eman die ikastetxeei, gutun baten bitartez.

Izan ere, Espainiako Gobernuaren ordezkari Denis Itxasok atzo adierazi zuen eskolak ezin direla lehenengo fasean ireki. Horrekin batera, sindikatuen, ikastetxeen eta hezkuntza komunitatearen arbuioa jaso du Eusko Jaurlaritzaren proposamenak azken egunetan.

Oraindik ere, Hezkuntza Sailak ikastetxe bakoitzaren esku utzi du erabakia, eta Josu Erkorekak azaldu duenez, maiatzaren 25etik aurrera "dinamika guztia" hasiko litzateke; askoz gehiago ere ez du argitu.

"Gure osasunarekin ez jolastu"

"Aurreko astean: maiatzaren 18an ikastetxe batzuk irekiko dira. Aste honetan: maiatzaren 18an zuzendaritzek erabakiko dute ireki ala ez. Gaur: irekiera maiatzaren 25era atzeratzen da. Bihar? Batek daki", adierazi du STEILAS sindikatuak.

Datari garrantzia kendu dio hezkuntza sindikatuak, eta "segurtasuna eta osasuna bermatzen dituen plangintza eta neurriak hezkuntza komunitate osoarekin adostea" garrantzitsuagoa dela ohartarazi dio Jaurlaritzari.

Halaber, STEILASek gogor kritikatu du Eusko Jaurlaritzaren jarrera: "Gure osasunarekin ez jolastu. Hezkuntza komunitatea inprobisazioekin aztoratu beharrean eskertuko genuke lehendabizi osasuna ziurtatzeko baldintzak gurekin adostea eta ondoren zehaztea data".

Erlazionatuak

Maiatzaren 18tik aurrera klasera itzultzeko plana aurkeztu du Hezkuntza Sailak

Araba

Batxilergoko 2. mailako ikasle eta irakasleak, goi-mailako Lanbide Heziketan matrikulatutako guztiak eta erdi-mailako LHko 2. mailakoak maiatzaren ...
Hezkuntza Sailak ikastetxeen esku utzi nahi du klasera itzultzeari buruzko erabakia

Araba

Hezkuntza Sailak lehen bilera egin zuen atzo hezkuntza arloko eragileekin, ikasgeletara itzultzeko plana adosteko. Cristina Uriartek zuzendariei es...
Egibidek aurrez aurreko klaseen itzulera atzeratzea eskatu du

Araba

"Harrituta gaude Hezkuntza Sailaren proposamenarekin. Lehen aldia da maiatzaren 18a agertzen dela ikasgeletara itzultzeko data gisa", kritikatu du ...

ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide