Batxilergoan, LHn eta DBHko laugarren mailan ikasturtea online amaitzeko aukera izango dute; eta ikastetxe bakoitzak aukeratu ahal izango du errefortzua behar dutenak bakarrik edo ikasle guztiak itzultzea.
Izan ere, Hezkuntza Sailak joan den astean aurkeztu zuen planak sindikatuen, ikasleen, institutu publikoen eta itunpeko eskoletako komunitatearen gaitzespenarekin egin du topo azken egunetan.
Eusko Jaurlaritzak aurkeztutako programak Batxilergoko, LHko eta DBHko laugarren mailako ikasleak aurrez aurreko eskoletara itzultzea proposatzen du, bi txandatan: maiatzaren 18an eta 25ean.
Hezkuntza Sailburuak bere hasierako proposamena zehaztu zuen atzoko bileran, eta zuzendariei erabakia ikastetxeen esku uztea eskaini zien. Hala ere, astelehenetik aurrera eskoletara itzultzen diren irakasle eta ikasleei babes ekipamenduaz -maskarak eta hidrogelak, besteak beste- hornituko die Hezkuntza Sailak.
Administrazioak, halaber, protokolo bat helaraziko die, osasun arloko neurri zehatzekin, eta baita zentroko espazioak antolatzeko irizpideekin. Gainera, jarraipen batzordeak martxan jarriko dira institutuetan sortzen diren beharrei erantzuteko.
Datozen egunetan sindikatuekin eta itunpeko sarearekin harremanetan egongo da sailburua, dena zehaztuko duen agindua argitaratu baino lehen.
Sindikatuen arbuioa
Bitartean, STEILAS, ELA, LAB, CCOO eta UGT sindikatuak klasera itzultzearen aurka agertu dira, langileen "osasuna eta segurtasuna" bermatu eta langileekin baldintzak negoziatu arte. Ikasgeletara itzultzera behartuz gero, plantoak iragarri dituzte astelehenerako.
Halaber, uko egin diote erabakia ikastetxeen esku uzteari, eta zuzendaritzei Hezkuntza Sailaren proposamena baztertzeko eskatu diete. Sindikatuen aburuz, ikastetxeek ez dute "gaitasunik" ezta "baliabiderik" ere langileak eta ikasleak babesteko neurriak ezartzeko.