Hamar orduko bilera —10:30etik ia 21:00ak arte—, aspaldiko partez Ertzaintzaren presentzia handia piketeetan, eta bi proposamen mahai gainean, Tubacexeko lan gatazka konpontzeko eta otsailaren 11n abiatutako greba mugagabearekin amaitzeko asmoz.
Alde batetik, enpresa batzordearena: zuzendaritzak EAEko Auzitegi Nagusiaren epaiaren aurka jarritako helegitea kentzea, borondatezko baja zein aurre-erretiroen prozesu baten truke; batzordeak uko egingo lioke hitzarmenean adostutako enplegua kontratatzeko konpromisoari; zuzendaritzak azpikontratazioari uko egitea; eta "traumatikoa ez den beste edozein neurri" aztertzea.
Bestalde, Tubacexeko zuzendaritzaren proposamena: helegiteari eutsiz, borondatezko bajen eta aurre-erretiroen prozesu bat irekitzea, EEEaren ondorioak murrizteko; horrekin batera, espedienteak eragindako kolektiboa berriro onartzea, "behin-behinean eta pixkanaka".
Langileen batzordearen ustez, zuzendaritzaren proposamena "ez da nahikoa", eta zuzendaritzaren lehentasuna "greba bertan behera uztea da". Horren aurrean, batzordeak azpimarratu du bere proposamenak ere greba bertan behera geratzea ekarriko lukeela, "betiere ipatutako helburuak bete ondoren".
Hortaz, oraingoz, greba mugagabeari eustea erabaki du enpresa batzordearen gehiengoak, proposamena sakonago aztertu eta negoziazioekin jarraituko badute ere. Grebaren 166. egunean izan da bilera, eta gaur, asteartean, greba 167. egunera iritsi da dagoeneko.