Burguko Udalak apiriletik aurrera martxan jarriko du hondakin organikoen etxez etxeko bilketa. Astelehenetan eta ostegunetan, etxeko atean ontzia utzi beharko dute burgutarrek, eta bilketa goizeko 10:00ak baino lehen egingo da. Konpostagailuak ere prest daude, eta giltzak bainatu zaizkie herritarrei horiek erabili ahal izateko; alta, etxez etxeko bilketa bezala, apirilaren 4a baino lehen ezin izango dira erabili. Errefusarako edukiontzia, berriz, astelehen eta ostegunetan 24 orduz erabili ahalko dute. Txartela hurbildu beharko dute irakurgailura, eta argi berdea ikusten dutenean tapa ireki eta zaborra bertan bota ahalko dute.
Udalak ohartarazi duenez, jaiegunetan ez da bilketarik egingo, eta hurrengo egunean egingo da. Birziklatzeko kit-a jaso ez dutenek udaletxera deitu beharko dute eta bertan emango diete.
Ingurumenaren babesak eta hondakinen lege berriak hondakin guztiak bereizita biltzera behartzen dituzte administrazioak. Legeak ezartzen duen %50eko birziklapena gainditzea da helburua, eta bide horretan hainbat urrats egiten ari da azken urteetan Burguko Udala. Hala, 2023an herri galdeketa egin zuen udalak etxez-etxeko sistemaren inguruan herritarren iritziak jasotzeko. Ondoren, irailean, hondakinen bilketa eta tratamendu zerbitzuaren ordenantza arautzaile berria onartu zuen; informazio kanpaina ere egin dute, eta hainbat batzar egin dira herrietan. Herri bakoitzean bilera egin ostean, etxeetara joan dira hondakinak biltzeko sistema berria azaltzeko eta birziklatzeko kit-a banatzera.
Araban, Arabako Errioxako Kripan eta Eltziego herriak aitzindari izan ziren atez ateko zabor bilketan. 2022an jarri zuten martxan bi herri horietan sistema berria.
