Raul Lopez de Uralde Aguraingo alkate berriak bando batean iragarri duenez —aste honetako ALEAn elkarrizketa—, Aguraingo Udalak dagoeneko ekin dio 2024. urteko udal aurrekontuak zehazteko prozesua. EH Bilduren udal gobernuak prestatuko du proiektu ekonomikoaren oinarria, baina herritarren iritzia jasotzeko eta euren parte hartzea bultzatzeko prozesu baten eskutik egingo du.
Horretarako, herritarrek beren proposamenak, ekarpenak eta iradokizunak aurkezteko aukera izango dute azaroaren 2ra arte, udal bulegoetan edo udalaren webgunean, iradokizunen postontziaren bidez.
Bestalde, azaroaren 15ean, asteazkenean, batzar irekia antolatuko dute 19:00etan Aguraingo udaletxean. Bertan, datorren urteko aurrekontuaren funtsezko ildo nagusiak aurkeztuko ditu udal gobernuak, baita ekarpenak aurrez aurre jaso ere. Alkateak parte hartzera deitu ditu Aguraingo bizilagunak.
