Akordiorik ez Tuvisan, hurbilketak izan diren arren

Erredakzioa 2024ko ots. 15a, 18:30
Tuvisako langileen gaurko protesta, udaletxearen atzean. ALEA

Sindikatuek eta zuzendaritzak "aurrerapauso nabarmenak" aipatu dituzte, hiru ordu baino gehiagoko bilera baten ostean. Tuvisako langileek manifestazio handi bat iragarri dute larunbaterako, 12:00etan Bilbo plazatik.

Aurrera doa Tuvisako langileen greba mugagabea. Inauterietako larunbatean hasitako lanuzteek erabateko jarraipena izan dute egunero: plantilla osoak bat egin du grebarekin; gutxieneko zerbitzuak direla eta, soilik autobusen %30 dago martxan, eta soilik zerbitzu hori bermatzeko langileak daude lanean. Ondorioz, grebaren eragina agerikoa izaten ari da hiriko garraio publikoan eta herritarren egunerokotasunean.

Gainera, udal enpresak kudeatutako aparkalekuak doakoak izango dira grebak dirauen bitartean. Besteak beste Santa Barbara plazako, Iradier Arenako eta Artium Museoko aparkalekuetan, hesiak igota eta makinak zerbitzutik kanpo daude.

Ostegun honetan, seigarren greba egunean, Tuvisako zuzendaritzaren eta enpresa batzordearen arteko bilerak markatu du agenda. Goizean, 09:00etatik aurrera, langileek Gasteizko udaletxearen atzean, Arkupeetan, egin dute protesta; arratsaldean, egunero bezala, 17:00etan abiatu da manifestazioa, Lovaina plazatik erdialderaino.

Negoziazio bilera hiru ordu baino gehiago luzatu da, baina "aurrerapauso nabarmenak" izan diren arren, akordiorik gabe amaitu da. Hainbat iturriren arabera, bi aldeek dokumentuak eta proposamenak elkarbanatuko dituzte datozen orduetan, gatazka desblokeatzeko eta grebarekin amaitzeko neurriak adosteko asmoz.

Larunbatean, manifestazioa

Otsailaren 17an, larunbatean, grebak astebete eramango du martxan, eta akordiorik ez badago, egunotako mobilizaziorik handiena iragarri dute Tuvisako langileek. 12:00etan abiatuko da Bilbo plazatik, eta enpresa batzordeak herritarrak gonbidatu ditu langileen aldarrikapenekin elkartasuna adieraztera.

Besteak beste, pentsiodunen mugimenduak ere manifestazioan parte hartzeko deia egin die "pentsiodun eta gasteiztar guztiei", eta babesa adierazi dio Tuvisako plantillari. "Norbait Gasteizko garraio publikoan arazoak sortzen ari bada, ez da Tuvisako plantilla, baizik eta haren kudeaketaren arduraduna, Gurtubai jauna", kritikatu dute ohar batean.

Plantillaren aldarrikapen nagusiak, besteak beste, lanpostuak bermatzea eta gehiago sortzea, pribatizatutako zerbitzuak berriro publiko izatea, eta langileen osasuna eta lanaldia errespetatzeko neurriak dira; tartean, fitxatzeko sistema ezartzea. "Eskatzen duguna ez da beharrezkoa, premiazkoa baizik", adierazi zuen Asier Lopez de Sabando enpresa batzordeko eledunak urtarrilaren amaieran, ALEArekin izandako elkarrizketan.

GUTXIENEKO ZERBITZUAK

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide