Azkena Rock Festival jaialdiaren sugarra 2023ko ekainean piztuko da berriz ere, hilaren 15ean, 16an eta 17an. Hiru egunez, Gasteiz nazioarteko rockaren hiriburu bihurtuko da berriz ere.
Mendizabaleko oholtzetan arituko diren lehen taldeak urrian baieztatu zituen Last Tourrek: Iggy Pop, Rancid, Lucinda Williams, Steve Earle, Melvins, Calexico, Queensrÿche, Monster Magnet, El Drogas, Pasadena, Brigade Loco eta beste hainbat.
Asteazken honetan, berriz, egunez eguneko kartela eta bigarren konfirmazio sorta iragarri dituzte. Horrekin batera, eguneko sarrerak eta abonamenduak ostegun honetan, abenduaren 15ean, 09:00etatik aurrera salgai jarriko dituzte. Bonuaren prezioa abenduaren 27ko 23:59ak arte egongo da indarrean.
The Pretenders eta Incubus
Oraingoan, The Pretenders mitikoak eta Incubus rock alternatiboaren ezinbesteko taldea batu dira XXI. edizioko kartelburuen zerrendara. Biak ostiralean, ekainaren 16an, arituko dira.
Lehenengo taldeak bere zorra kitatuko du, jaialdiaren historian falta zen klasiko handienetako bat zelako; Chrissie Hynde liderrak, New Wave-aren ordezkari nagusiak, musikagileak, abeslariak, gitarristak, aktibista feministak eta rockaren ikonoak, berriz ere gogoraraziko du lehen mailan jarraitzen duela bere kantu berriekin, baita klasikoekin ere, memoria kolektiboan ezarritako Brass in the pocket edo Don't get me wrong klasikoekin.
Incubusen eskutik, berriz, 90eko hamarkadako eta XXI. mendearen hasierako ereserkiak entzungo dira. Taldeak 23 milioi disko baino gehiago saldu ditu eta Grammy sarietarako hainbat izendapen ditu.
Nazioarteko taldeak
Horiez gain, maila handiko nazioarteko hainbat talde iragarri dituzte ere. Alter Bridge, hard rockaren eta metal alternatiboaren talde arrakastatsuenetako bat. Lehen aldiz ARFn, The Undertones punk rockaren klasikoa eta, besteak beste, Teenage Kicks ereserkiaren sortzailea. Soinu-nahasketa interesgarrienetako bat, art rocka, punka eta psikodelia uztartzen dituen Lydia Lunch Retrovirus, asaldatzaile kontrakultural ikonikoak gidatuta. Jugoslaviatik, Ana Popovic gitarrista bertutetsu eta blueswoman leherkorrak garbizaletasunetik ihes egiten duen blues bat erakutsiko du, mundu osoan zehar sariak, kontzertuak eta kolaborazioak pilatu ostean.
Estatuan sekula ikusi gabeko The Nude Party talde gazte estatubatuarra Arctic Monkeys, Jack White edo King Gizzard And The Lizard Wizarden gomendio-gutunarekin dator. S8nt Elecktric, Slashen semearen taldea. Rock'n'roll klasikoko banda berri bat, The Guapos, non Leiva pop-rock ikonoa bateria-jotzaile gisa aritzen den, El David Aguilar, Adan Jodorowsky eta Jay De La Cueva rock musikari mexikarrekin batera. Isaiah Mitchell gitarrista Earthless rock psikodeliko eta stoner talde mitikoarekin itzuliko da gurera, disko berria eskuetan.
30 urte baino gehiagoko ibilbide musikala atzean duen psikodelia eta power pop estiloko The Bevis Frond talde sailkaezina ere iritsiko da Gasteizera, rockzale gourmeten gozagarri izateko; rena, show-ak ireki dituztenentzat. Horrez gain, Nat Simons kantautoreak (Joan Jett edo Suzi Quatro espainiarra) eta Cherie Currie The Runaways taldeko abeslari ohiak kolaborazio oso berezia eskainiko dute jaialdian.
Halaber, Jim Jones rockerra ere Mendizabalara itzuliko da, 2018an Thee Hypnotics taldearekin eta 2010ean The Jim Jones Revue taldearekin egon ostean. Oraingoan, Mendizabala osoa dantzan jartzeko asmoz, bederatzi musikariz osatutako Jim Jones All Stars bertsio iluneko bandarekin dator.
Euskal Herriko taldeak
Euskal eszenari dagokionez, bi iragarpen egin dituzte antolatzaileek. Alde batetik, Liher, Lide Hernando abeslari eta gitarrista karismatikoa buru duen eta, rockaren askotariko adarrekin esperimentatuz dagoeneko lau album kaleratu dituen talde sendoa.
Bestalde, Ezpalak talde gazteak estilo propioa, heldua eta garaikidea duela erakutsiko du. Hortz aina hots hirugarren diskoa kaleratu dute duela gutxi, Oso Politaren eskutik, eta zuzeneko sendoarekin aurkeztuko dute.
EGITARAUA
