Iggy Pop, Rancid eta Lucinda Williams izango dira 2023ko Azkena Rock jaialdian

Erredakzioa 2022ko urr. 21a, 09:20
Iggy Pop, punk rockaren ikonoa. / ALEA

Ekainaren 15etik 17ra Mendizabalan ospatuko den Azkena Rock Festival jaialdiaren lehen baieztapenak dira, Steve Earle, Melvins, Calexico, Queensrÿche, Monster Magnet, El Drogas, Pasadena, Brigade Loco eta beste hainbat talderekin batera.

Azkena Rock Festival jaialdiaren sugarra 2023ko ekainean piztuko da berriz ere, hilaren 15ean, 16an eta 17an. XXI. edizioarekin, Gasteiz hiru egunez nazioarteko rockaren hiriburu bihurtzeko. Ostiral honetan, Mendizabaleko oholtzetan arituko diren lehen taldeak baieztatu ditu Last Tourrek.

Hiru dira konfirmatutako lehen kartelburuak: Iggy Pop ospetsua, punkaren ikurra eta rockaren ikonoa, Azkena Rocketik 2003 eta 2006ko edizioetan igaro ostean, bere sasoi onenean itzuliko dena; horrekin batera, Lucinda Williamsen unibertso liluragarriaz gozatu ahal izango da berriz ere, 2016an bezala, azken hamarkadetako konpositorerik garrantzitsuenetakoa dela eta amerikar musikan inoiz baino indar handiagoa duela erakutsiz; gainera, punk rockaren historiako talde garrantzitsuenetako bat, Rancid, lehen aldiz iritsiko da ARFra, bere 30. urteurrenean.

 
Steve Earle, Melvins, Calexico, Queensrÿche eta Monster Magnet

Bestalde, Steve Earle ere Arabako hiriburura hurbilduko da, rockaren historian ezinbesteko musikaria dela erakusteko, bere gitarra akustikoarekin lagunduta. 90eko hamarkadako talde mitikoenetako bat eta jaialdiko ikusleek gehien desiratzen dutena, Melvins, bertan izango da ere.

Mendizabala sutan jarriko duten lehen mailako artisten izebergaren punta baino ez dira horiek; besteak beste, honako hauek ere izango dira Azkena Rock-en: Calexico, Amerikako iparraldeko mugaren bi aldeetako eraginen nahasketarekin; gitarra basatienak Queensrÿche bezalako taldeen eskutik iritsiko dira, Gasteizen lehen aldiz izango den 80ko hamarkadako heavy metalaren mito bizia; edota Monster Magnet, hard rockaren eta stoner espirituaren ordezkari handiak.

El Drogas, GWAR, Lucero, Os Mutantes, Matchbox eta Bones of Minerva

Aurtengo edizioak El Drogas-ekin kontatuko du ere. Bere bakarkako ibilbidea berez errespetatua da, baina, gainera, Enrique Villarrealek duela 40 urte sortutako Barricada taldearen errepertorioarekin dator Gasteizera. Rockaren eta metalaren alderik muturrekoena GWAR taldearen zuzeneko zirraragarriarekin iritsiko da; umore beltz bereizgarria, latexezko maskarak eta antzerki gisako eszenaratzearekin. Lucero AEBetako country alternatiboaren ordezkari gisa izango da jaialdian.

Garagearen eta psikodeliaren ukitua Os Mutantes taldeak jarriko du, hainbat hamarkadako ibilbidea duen Brasilgo talde mitikoa, eta rockaren historia bizia. 40 urte baino gehiagoko historiarekin, Matchbox britainiar rockabilly ospetsuak jatorrizko formazioarekin etorriko dira, eta zuzenean entzun ahal izango da Rockabilly Rebel ereserkia, 1979an mundu osoa hankaz gora jarri zuen hit-a.

Nazioarteko lehen konfirmazioak Madrilgo Bones of Minerva taldearekin itxi dituzte; stoner talde amorratua, oso sendoa, eta lau emakume gaztek osatutakoa, Espainiako estatuko rockaren belaunaldi berriaren erakusgarri.

Brigade Loco eta Pasadena

Euskal eszenaren ordezkaritza bi talderen eskutik iritsiko da: Brigade Loco, itzal handiko talde gaztea, Euskal Herriko punta-puntako punk rock taldeetako bat; eta Pasadena, Jon Basaguren eta Libe Garcia de Cortazar gasteiztarren proiektu berria, Izaki Gardenak aurreko proiektu bateratuaren ostean.

Sarrerak eta abonamenduak

Publiko fidelenari keinu eginez, Azkena Rock Festival jaialdiak aurresalmenta berezia jarriko du martxan urriaren 24ko 09:00etatik aurrera (hilaren 27ra arte), eta publiko orokorrak hilaren 28ko 09:00etatik aurrera erosi ahal izango ditu sarrerak. Aurtengo berrikuntza gisa, jaialdiak Gazte Bonua jarriko du 15 eta 23 urte bitarteko publiko gazteenaren eskura. 14 urtetik beherakoentzako sarrera doakoa izango da, aurreko edizioetan bezala, familiak jaialdira joatea bultzatzeko:

  • Bonu berezia (aurresalmenta): 110 euro
  • Bonua: 130 euro
  • Gazte Bonua: 100 euro
  • Kanpina (lau gau): 20 eurotik aurrera

Gainera, urriaren 24tik aurrera, bonu eta welcome pack pakete berezi bat ere jarriko da salgai, azken 20 urteetan jaialditik igaro diren protagonisten kontakizunak jasotzen dituen liburu batekin eta kamiseta berezi batekin.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide