Pintada LGTBIfobikoak agertu dira Arantzabela ikastolan, umeek egindako horma-irudian

Erredakzioa 2022ko ots. 8a, 09:00
Horrela esnatu zen astelehenean Arantzabela ikastolako jolastokia. / Argazkia: @maternalias

"Putos gays", "Fuck LGTB", "Fuck maricones" eta bestelako mezu LGTBIfobikoak dituzten pintadak agertu dira Gasteizko Arantzabela ikastolako jolastokian, berdintasunaren alde ikasleek egindako horma-irudi baten gainean.

Berdintasunaren eta LGTBI eskubideen aldeko horma-irudi baten aurkako beste eraso bat Gasteizen. Duela hilabete batzuk, ekainean, margoketa homofobo eta transfoboak agertu ziren Umandi ikastolan, LGTBIfobiaren aurkako horma-irudiaren gainean.

Oraingoan, Arantzabela ikastolan gertatu da, duela gutxi umeek egindako horma-irudi baten aurka: ortzadarra, "harrotasuna", "askatasuna", "berdintasuna", "aniztasuna", "errespetua", "maitasuna" eta "duintasuna" bezalako hitzak zituen artelana erasotua izan da. Horren gainean, zakilak, "Putos gays", "Fuck LGTB", "Fuck maricones" eta bestelako mezu LGTBIfobikoak margotu dituzte.

"Horrelako jarreren aurrean, eskola komunitateak bat egiten du pertsonen duintasunaren kontra eta ikastolan egindako lan artistiko, aldarrikatzaile eta parte-hartzailearen aurkako ekintza iraingarri hau salatzeko", adierazi du ikastetxeak. Bere aldetik, eskola komunitatea "oso triste eta haserre" dagoela azaldu du Cira Crespo ALEAko kolaboratzaile eta eskolako gurasoak.

"LGTBI+ kolektiboari mezu bat"

Ikusgune Gasteizko LGTBI+fobiaren aurkako Behatokiak gertakaria erregistratu du, eta ikastolaren esku jarri da "behar duten guztirako". Horrekin batera, "babes osoa" adierazi dio ikastetxeko hezkuntza komunitateari, "batez ere bertako kide diren LGTBI+ pertsonei".

"Ez dira ezagutzen ditugun lehenengo pintaketak, ezta horma-irudiak erasotuta esnatzen den lehenengo ikastola ere. Ikasgeletan sexu eta genero aniztasuna ikusarazteko ahaleginak jomuga bilakatu dira zisheteroarauaz haratago bizi eta harremantzea erreprimitu eta ukatu nahi dutenentzat", salatu du Ikusgunek.

Behatokiak "larritasunez" ikusi du gertatutakoa, pintada horien bidez "egileek LGTBI+ kolektiboari mezu bat helarazi" nahi izan diotelako. "Hori are larriagoa da hezkuntza zentroetan gertatzen bada, mezu horiek bertara joaten diren haurrei helarazten saiatuz", ohartarazi dute.

"Gasteizek azken hilabeteetan erakutsi du ez dagoela prest bere kaleetan gorrotoa onartzeko, salaketa soziala ezinbestekoa da gorroto diskurtsoei aurre egiteko. Gasteiztarrak horrelako erasoen aurka agertzera gonbidatzen ditugu, LGTBI+ eta trans banderak ikusaraziz beren leihoetan, jaken hegaletan, udalerriko ikur bihurtu diren oihalezko poltsetan, nahi dituzten une eta espazio guztietan eta eskura dituzten objektu guztiekin. Denon artean egin diezaiokegu aurre gorrotoari", aldarrikatu du Ikusgunek.

Txikizioak jolastokian

2021eko martxoan, ALEAn argitaratutako gutun batean, Arantzabela ikastetxeko gurasoek ohartarazi zuten ikastolako patioan astebururo gertatzen ziren "gizabidearen kontrako jokabide eta txikizioak". Besteak beste, botilioi eta suteen arrastoak, kondoiak, kristalak eta kakak agertzen zirela salatu zuten. "Egoera oso larria da eta konponbide egonkor bat eskatzen dugu instituzioen aldetik", aldarrikatu zuten.

Elkartasun mezuak

Haur eta Lehen Hezkuntzako ikastetxe publikoak elkartasunezko mezu ugari jaso ditu berehala:

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide