Urtarrilaren 19an aurkeztuko dute Gasteizko Euskaraldia

Euskaraldiaren 2020ko edizioaren prentsaurreko bat, Oihanederren. / ALEA

Azaroaren 18tik abenduaren 2ra ospatuko den Euskaraldiaren hirugarren edizioak lehen urratsa emango du Gasteizen datorren asteazkenean, hilaren 19an. Mahai-ingurua, antzerkia eta bideo emanaldia izango dira Europa Jauregian, 17:00etatik 20:00etara.

Hamar hilabete pasatxo falta dira Euskaraldiaren hirugarren ediziorako. 2022ko azaroaren 18tik abenduaren 2ra bitartean egingo da, Hitzez ekiteko garaia lelopean, eta ariguneen apustuari jarraipena emanez.

Herrietako lantaldeak dagoeneko martxan daude, baita Araban ere, eta, urte hasieratik ekiteko asmoz, Gasteizko Euskaraldiaren aurkezpena urtarrilaren 19an egingo dute, 17:00etatik 20:00etara Europa Jauregian. Horretarako, hiru jarduera antolatu dituzte arratsalde osoko egitaraua osatzeko: Auzoetatik lan mundura ekiten! mahai-ingurua, antzerkia Aitor Vinagret eta Ane Gebararen eskutik, eta ariguneei buruzko aitortza bideoen emanaldia.

Ekitaldiaren antolakuntza errazteko, beharrezkoa izango da aldez aurretik izena ematea, eta horretarako formulario bat jarri dute martxan.

"2022. urtea… Badator berriz Euskaraldia. Baina ez dator bakarrik, Korrikaren urtea ere izango baita aurtengoa. Ekin diezaiogun urteari eskuz esku, pandemiak eragindako gorabeherak gainditu eta ilusioz, korrika eta kalaka, euskarari urtebeteko ibilbide oparoa irekiz", ospatu dute Euskaraldiaren antolatzaileek.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide