Ostegun honetan, irailaren 9an, LGTBI+ eskubideen aldeko festa handia biziko du Zabalgana auzoak, LGTBI+fobiarik ez - El odio no cabe en nuestras calles lelopean. Izan ere, Zabalgana Batuz auzo elkarteak eta Ikusgune Gasteizko LGTBI+fobiaren aurkako behatokiak ekintzaz beteriko protesta antolatu dute, ostadarraren koloreak dituen poltsa bat eramateagatik hamabi urteko neska bat jazarri zuten lekuan: Zabalganeko skate parkean bertan.
18:00etatik aurrera, lau jarduera nagusi izango dira, jai giroan: patinajea, Aniztasunaren zuhaitza, marrazketa tailerra eta musika.
Ostadarraren banderak, motxilak, poltsak, kamisetak eta bestelakoak etxetik eramateko dei egin dute antolatzaileek. Hala ere, LGTBI+fobiaren aurkako poltsa berriak salgai jarriko ditu Ikusgunek. Sei eurotan erosi ahal izango dira, eta etekinak LGTBI+fobiari aurre egiteko ekimenak finantzatzeko izango dira.
Zure genero identitateagatik edota sexu orientazioagatik erasotua edo baztertua sentitu bazara, edo gertaera horien lekuko bazara, harremanetan jar zaitezke Ikusgune Gasteizko LGTBI+fobiaren aurkako behatokiarekin:
☎ 633 309 653 / ✉ info@ikusgune.eus / ◉ www.ikusgune.eus
