Topaguneak, GEU Elkarteak, Lazarraga Elkarteak eta Arabako ALEAk elkarlanean antolatutako Eragiteko janzten: Gasteizko euskaltzaleon gogoetarako une eta guneak hitzaldi zikloaren hirugarren saioa apirilaren 20an, asteartean, izango da Oihaneder Euskararen Etxean.
Maialen Iñarra (Soziolinguistika Klusterra) eta Zesar Martinezen (EHUko Parte Hartuz Institutua) txanda izango da oraingoa, Herritarrak eta euskara: aktibaziorako gakoak izenburupeko saioan. Tokian toki, hizkuntza-aktibazioa sustatzeko gakoak eta egin litekeen prozesua zeintzuk diren aurkeztuko dute hizlariek.
Hau da, herritarrak euskararen jiran aktiba daitezen zaindu beharreko gakoak aztertuko dituzte, baita aktibazio horretarako egin litekeen prozesua azaldu ere. Emaitza horiek Soziolinguistika Klusterrak gidatutako Tokian tokiko hizkuntza-aktibazioa ikerketaren bidez jaso dira.
Saioaren bigarren orduan, Gasteizko Salburua auzoko Sarburu elkartea eta Abetxukuko euskara elkarteko kideek haien aktibazio ikuspegiak azalduko dituzte. Hortaz, aukera izango da auzo horietako aktibazio prozesuak ezagutzeko, eta saioaren lehen orduan aurkezturiko gakoekin alderatzeko.
Izen-ematea
Eragiteko janzten jardunaldietako azken bi saioetan parte hartzeko ere, ezinbestekoa da izena ematea eta hiru euroko matrikula ordaintzea. Izena ematen duten lagunek baieztapena jasoko dute, eta edukiera bete arte izango da apuntatzeko aukera.
Hirugarren edota laugarren saioan izena emateko, honako formularioa bete behar da: Eragiteko janzten.
Eragiteko jantzen zikloa
Gasteiztar euskaltzaleei (in)formaziorako, hausnarketarako, elkar ezagutu eta aberasteko une eta guneak eskaintzea da Eragiteko janzten jardunaldien helburua. Guztira, lau jardunaldi izango dira, eta saio guztien bideoak ikusgai izango dira ALEAren webgunean. Oraingoz, horietako bi daude sarean ikusgai, eta beste biak ere eskuragarri izango dira aurrez aurreko saiotik egun batzuetara:
1. Aldahitz ikerketa eta Ulerrizketa metodologia - Pello Jauregi.
2. Berrindartu eta jauzi - Jasone Mendizabal eta Iñaki Martinez de Luna (Topalabe taldea)
