Hamabost bizilagun etxegabetu dituzte Gasteizko Herrandarren kalean

Erredakzioa 2021ko urt. 26a, 14:35
Deskargatu Info Ahotsak :
es en fr

Ertzaintzaren karga, Herrandarren kaleko etxegabetzearen azken uneetan. / ALEA

Udaltzaingoak eta Ertzaintzak gauzatu dute Herrandarren kaleko 15. zenbakian okupatutako eraikinean bizi ziren hamabost lagunen aurkako etxegabetze agindua. Gainera, Udaltzaingoak bi bizilagun atxilotu ditu Atzerritartasun Zerbitzuaren esku uzteko.

Etxebizitza Sindikatuak joan den astean ohartarazi zuenez, urtarrilaren 26ko 11:00etatik aurrera, hamabost bizilagunen etxegabetzea gauzatu da Gasteizko Herrandarren kaleko 15. zenbakian. «Inongo alternatibarik eskaini gabe, pertsona horiek kale gorrian geratu dira», salatu dute. 10:30ean bertaratzeko deialdia zabaldu du Etxebizitza Sindikatuak, etxegabetzea gelditu eta bizilagunen egoera salatzeko asmoz.

Poliziaren presentzia handia izan da goizeko lehen ordutik, eta 40 pertsona inguru eraikinaren barruan itxi dira, etxegabetzeari aurre egiteko. Kanpoan, barrukoei babesa adieraztera hurbildu diren dozenaka pertsona.

11:00ak aldera, sarrailagilea eta epaitegiko ordezkariak eta prokuradorea iritsi dira. Bertaratutakoek eta etxe barrukoek etxegabetze agindua desobeditzeko eskatu diete, baina desalojoak aurrera egin du. Ordubete inguru luzatu da sarrailagilearen ahalegina, baina, azkenean, ireki ezinik, Udaltzaingoak atea apurtzeari ekin dio.

Bitartean, Ertzaintza eta manifestariak kalean zeuden, aurrez aurre. Azkenik, 12:00ak aldera, atea irekitzea lortu du Udaltzaingoak, baina atearen atzean oztopo gehiago topatu ditu. Oztopoak kendu ostean, barruan zeuden pertsonak ateratzeari ekin diote, banan banan: batzuk bizilagunak ziren, eta beste batzuk Etxebizitza Sindikatuko kideak. Etxegabetzearen azken uneetan sortutako tentsioaren testuinguruan, Ertzaintza kargatzen hasi da, eta zenbait pertsona identifikatu ditu.

Azkenean, etxegabetzea gauzatu egin da. Etxebizitz Sindikatuko bozeramaileek amaitutzat eman dute desalojoa, baina San Antonio kaleko Gizarte Zerbitzuen egoitzara eramango dute protesta.

Bi lagun Atzerritartasun Zerbitzuaren esku

Bizilagunetako bi atxilotu egin dituzte, jakinarazi dietenez, Atzerritartasun Zerbitzuaren esku uzteko; hau da, Espainiako Poliziaren esku geldituko dira.

Etxebizitza Sindikatuak gogor salatu du bi pertsona horiekin gertatutakoa: «Errolda duten eta erregularizatuta dauden bi pertsona dira», azaldu du Etxebizitza Sindikatuak. «Etxegabetze batekin hasi eta deportazio batekin amaituko dugu? Beharrezkoa al da etxerik gabe uztea eta, gainera, deportatzea?», galdetu diote Gorka Urtaran alkateari, sare sozialen bitartez.

«Birjabetutako» eraikina

Herrandarren kaleko 15. zenbakiko blokea 2020ko udan okupatu zuten 30 pertsona inguruk. Hamar urte baino gehiago hutsik egondako bloke bat «birjabetzeko» asmoarekin. Etxebizitza Sindikatuak «etxebizitza lortzeko beste aukerarik ez zuten» pertsona horiei babesa eskaini zien, eta «espazioa antolatu eta defendatzeko baliabide guztiak» jarriko zituela adierazi zuen.

Bost familia, kalera

Handik sei hilabetera, abenduan, eraikin horretan bizi diren bost familia etxegabetuak izateko arriskuan zeudela ohartarazi zuen Etxebizitza Sindikatuak, eta «etxegabetzeen aurka, langile kontrola» aldarrikatu zuen. Azaldu zutenez, «etxegabetze express» prozeduraren lehen kasuetako bat litzateke hau Gasteizen, eta, formula juridiko horren arabera, etxegabetuko dituzten bizilagunek ez dute helegiterik aurkezteko aukera.

Azkenik, urtarrilean iritsi da behin betiko etxegabetze agindua: Herrandarren kaleko 15. zenbakia borondatez utzi ezean, polizia etxegabetzea gauzatzera bertaratu da, urtarrilaren 26an, 11:00etan.

ZUZENEKO JARRAIPENA @ArabakoALEA Twitter kontuan
Gizartea Gasteiz

Izan zaitez ALEAkide!

ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu? Aukera ezberdinak dituzu gure proiektuarekin bat egiteko.

Informazio gehiago