Sarean

Lesbofobia salatu dute 'El Conquis' saioko finalean

Astelehen honetan izan da 'El Conquis' saioaren finala. / IKUSGUNE

Ikusgune Gasteizko LGTBI+fobiaren aurkako behatokiak salatu du ETB2ko El Conquis saioko aurkezle Julian Iantzik iruzkin lesbofoboak zuzendu zizkiola Eider Garcia Durana lehiakide gasteiztarrari. Polemika piztu da sare sozialetan.

Astelehen honetan ospatu da ETB2ko El Conquis saioaren finala. Aurkezleak behin eta berriz galdetu zion Gasteizko lehiakideari bere "emaztearekin" duen harremanagatik, eta "broma bat" ote den ere galdegin zion. Ikusguneren arabera, gertatutakoa "onartezina" da telebista publikoan.

Euskadiko Gazteriaren Kontseiluak "eraso LGTBI+fobo" gisa definitu ditu Iantziren hitzak, eta hamaika dira Twitterren aurkezle ezagunaren jarrera kritikatu duten erabiltzaileak.

Testuingurua

Bestalde, aurkezlearen hitzak testuinguruan kokatzen saiatu dira beste hainbat txiolari; izan ere, 24 urteko lehiakide gasteiztarrak lagun batekin ezkondu zela azaldu zuen castingean, eta, antza, aurkezleak horregatik egin zion galdera.

Astearte gauean, Julian Iantzik egindako adierazpenen harira, EiTBk ohar bidez barkamena eskatu die minduta sentitu diren pertsona eta kolektiboei, baina aurkezlearen galderen testuingurua azpimarratu du, castingari erreferentzia eginez. Horrez gain, asteleheneko audientziaren datu onak goraipatu ditu, publikoak saioari emandako "babesaren froga" gisa. Iantzik ere publikoki adierazi du galdera "LGTBIrekin zerikusirik ez duela".

Azkenik, Duranak berak bideo bat argitaratu du aurkezleak galdera intentzio txarrik gabe egin zuela azaltzeko. Halaber, castingean egindako adierazpenak gogora ekarri ditu.

Hala eta guztiz ere, Duranaren kasutik harago, Iantziren galdera lekuz kanpo dagoela kritikatu dute txiolari gehienek, tonuagatik eta jarrera "morbosoa" dela eta; izan ere, final osoan egindako beste hainbat adierazpen batzuk kritikatu dituzte ere, are larriago hedabide publiko batean egiteagatik.

Erlazionatuak

Sexu eta genero dibertsitatearen aurkako 25 eraso salatu dituzte azken urtean Araban

Araba

Ikusgunek 25 eraso zenbatu ditu Araban 2019ko maiatzetik 2020ko apirilera bitartean. Salaketen kopurua nabarmen igo da, Gasteizko LGTBI+fobiaren Au...

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide