Errekaleor botatzeko arrazoirik ez dago, txosten baten arabera

Erredakzioa 2017ko uzt. 13a, 15:10
Agerraldia egin dute udaletxean, txostena alderdi politikoei helerazi ostean.

Almudena Perez arkitekto teknikoak egin du txostena, beste hamazortzi adituren babesarekin, Errekaleorren aldeko manifestua sinatu zuten 141 lagunek eskatuta. 

Maiatzean Errekaleorren aldeko manifestua sinatu zuten 141 lagunek auzoko etxeak botatzeko arrazoirik ez dagoela justifikatzen duen txostena aurkeztu diete udal talde politikoei. Astelehenean, Irabazi, Podemos eta EH Bildu udal taldeek auzoaren eraispena justifikatzeko udalaren txostenik ez dagoela salatu zuten, eta kezka horrek bultzatuta, Errekaleorreko eraikinen egoeraren inguruko txostena egitea eskatu zioten Almudena Perez arkitekto teknikoari. Gaur udaletxean erregistratu duten dokumentua beste hamazortzi arkitektok babestu dute, eta Arabako Aparejadore eta Arkitekto Teknikoen Elkargo ofizialaren zigilua jaso du.
 
"Txosten honek frogatu du Errekaleorreko etxeen egoerak ez duela botatzeko arrazoirik azaltzen. Auzoko bizilagunak ez daude arriskuan", azaldu dute 141 sinatzaileen ordez bertan izan diren Bingen Mendizabal musikariak, Txema Ramirez de la Piscina EHUko irakasleak eta Oihane Perea bertsolariak. "Errekaleor Bizirikena hiriaren aniztasuna aberasten duen proiektu bat da, eta txosten tekniko honek Errekaleor auzoan garatu daitekeela erakusten du", zehaztu dute.
 
Gainera, Errekaleor eraistea, ondare historikoa izanik, "ekologikoa, errentagarria eta positiboa" ez dela gaineratu dute. 
 
Arkitektoaren txostena mahai gainean dutela, "eraisketa prozesua gelditzeko eta elkarrizketa abiatzeko" eskatu diete Gasteizko udaleko alderdi politikoei.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide