Oposizioak eskatuta, agerraldia egin du eguerdian Gorka Urtaranek, Lan, Garapen Ekonomiko Jasangarri eta Sozietate Publikoen Sustapenerako batzordean, iragan ostegunean Errekaleor auzoan gertatutakoaz azalpenak emateko. "Ez dago negoziatzeko aukerarik, eta, beraz, auzoa eraitsi behar da. Ensanche 21 erakundeari esan diogu prestatzen joan dadila Errekaleor eraisteko proiektua, hori izango baita emango dugun hurrengo pausoa", esan du Urtaranek.
Agerraldian ere Gasteizko hiru batzokitan agertutako pintaden egileak izatea egotzi die Errekaleorreko bizilagunei. "Ez bada eurek esandakoa egiten, liskarrak sortzen dituzte", gaineratu du alkateak.
Argindarraren mozketari dagokionez, 2015eko martxotik "arriskua berehalakoa" dela azaldu du; orduan teknikariek "irregulartasun oso larriak" antzeman zituztenean. "Horrek guztiak sute, istripu, zirkuitulabur eta deskarga arriskua dakar. Eta bihar norbait hiltzen bada istripu baten ondorioz? Zer egingo zenukete? Niri egotzi?", galdetu die EH Bildu, Podemos eta Irabaziko zinegotziei.
Urtaranen hitzek ez dute oposizioa konbentzitu, eta auzoaren garapena moztea eta auzia konpontzeko ezer egin ez izana egotzi diote.
