Ukrainari laguntzeko beste bidaia bat iragarri du La Exploradorak

Erredakzioa 2024ko mai. 13a, 09:59

Dokumentalean ukrainarrek bizitzen duten egoera salatuko dute. Argazkia: OLEKSANDR RAKUSHNYAK / EU CIVIL PROTECTION AND HUMANITARIAN AID

Herrialdera egingo duten hurrengo elkartasun bidaian ibilgailu bat eta material medikoa eramango dituzte. Dokumental bat egingo dutela aurreratu dute.

Eutsi Ukraina eta beste hainbat elkarte eta eragilerekin elkarlanean, Errusiak 2022an hasitako inbasioaren ondoren Ukrainak bizi duen "unerik gogorrenean" beste behin laguntza humanitarioa eramateko bidaia iragarri du La Exploradora elkarteak.

Besteak beste, Oriental Star gobernuz kanpoko erakundeari ibilgailu bat lagako diotela iragarri dute. Gerra zauriek desitxuratutako soldaduen aurpegiak berreraikitzen ahalegintzen da elkarte hori. Modu berean, Kieveko ospitalera material medikoa eramango dute, eta Mission Kharkiv erakundearekin ere elkarlanean jarraituko dute. Azken honek minbizia duten pertsonei laguntza ematen die, eta, besteak beste, energiari lotutako azpiegituretan lan egiten duten langileei lehen sorospenak egiten irakasten diete, errusiar armadak ukrainar azpiegitura zibilak bonbardatzen dituenean ahalik eta biziraupen tasa handienak lortu nahian.

"Gerraren hasieratik lagundu dugu, eta, orain, lehenbailehen laguntza behar dugu berriz ere proiektu hauek gauzatzeko", azaldu du La Exploradorak. Sare sozialen bitartez kontu korronte zenbaki bat zabaldu dute, nahi duen orok diruz lagundu ahal izateko. 

Aurreko bidaietan bildutako materialarekin eta oraingo honetan eskuratutakoarekin Kalinka Roja: resiliencia de un pueblo ante la invasión rusa izeneko dokumentala grabatuko dutela aurreratu dute. Bertan salatu nahi dute "inbasioaren ondorioz populazio zibila bizitzen ari den sufrimendua". Iragarri dute laguntza emango duten lagun guztien izen-abizenak dokumentalaren kredituan jartzeko asmoa dutela.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide