Manu Sagastume musikaria hil da

Erredakzioa 2024ko ots. 19a, 13:00
Manu Sagastume, 2020. urteko solasaldi batean. Argazkia: eresbil.eus

78 urterekin zendu da Manu Sagastume musikari eta kultur eragile arabarra. Besteak beste, Araba Abesbatzaren sortzaileetako bat izan zen.

Joan den larunbatean, otsailaren 17an, hil da Manu Sagastume Arregi, 78 urte zituela. 1945ean Ziordian (Nafarroa) jaio bazen ere, Gasteizen eman zuen bere bizitzaren zatirik handiena. Marketineko goi-mailako teknikaria eta Euskal Ikasketetan diplomatua izateaz gain, musikaria, ikertzailea, abesbatzen zuzendaria eta kultur eragilea izan zen urte luzez.

Besteak beste, Araba Abesbatza eta Capilla Peñaflorida abesbatza martxan jarri zituzten lagunen artean zegoen, eta zuzendari gisa aritu zen ere. Bere burua musikaren izen handien dizipulutzat jotzen zuen, hala nola Carmelo Bernaola, Luis Aramburu, Jose Rada eta Sabin Salaberri. Arreta berezia eskaini zion XVII. eta XVIII. mendeetako musikari, eta hainbat transkripzio egin zituen, Juan Garcia de Salazar, Juan Frances de Iribarren, Juan y Matias de Durango, Antonio Literes, Antonio Rodriguez de Hita eta Juan Hidalgo bezalako konpositoreen lanak transkribatuz.

Horrez gain, Jesus Guridi Musika Kontserbatorioko liburuzaina izan zen ere, eta Arabako kulturaren zein musikaren inguruko artikulu eta ikerketa ugari idatzi zituen, esaterako: La Ilustración musical: música y músicos en el País Vasco del siglo XVIII; Gasteiz eta musika: zortziehun urte adiskidetasunean; Evolución en la música para txistu; eta Musika Araban, Sabin Salaberri eta Rafael Mendialduarekin elkarlanean ondutakoa.

Azken hamarkadetan Arabako kulturari egindako ekarpenaren oinordeko dira bere hiru semeak: David, kontratenorra eta biolontxelista; eta Jabolo eta Koldo, soinu, argiztapen eta produkzio teknikoan diharduen Sagasound enpresa erreferentearen sortzaile eta arduradunak.

Astearte honetan, otsailaren 20an, izango da hileta, 19:30ean San Migel Goiaingeruaren elizan.

Erlazionatuak

Agur esan du Araba Abesbatzak

Erredakzioa 2023 eka 29 Araba

Mila motibo kantatzeko alai

Anakoz Amenabar 2023 abe 01 Araba

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide