Gasteizko lehen indarra izatea lortuta, EH Bilduren igoera Arabako Batzar Nagusietara zabaldu da ere. Boto gutxiko aldearekin, EAJk (15 batzarkide, bi galduta) lehen indarra izaten jarraitzen du, baina bi ezberdintasun nagusirekin 2019ko emaitzekin alderatuta: alde batetik, PSErekin (9 batzarkide, bat galduta) batera ez du gehiengo absolutua osatzen; bestetik, EH Bildu (14 batzarkide, bi irabazita) lehen indarra izatetik 1.200 boto ingurura gelditu da.
Hortaz, Ramiro Gonzalezek akordio berriak bilatu beharko ditu hirugarren aldiz foru gobernuaren buru izan nahi badu. Joko horretan sartuko dira, bigarren eta hirugarren indarraz gain, PP (9 batzarkide, bat irabazita) eta Elkarrekin Podemos (3 batzarkide, bat galduta).
Nolanahi ere, EH Bilduko ahaldungai Eva Lopez de Arroyabek diputatu nagusi izateko aukera izango luke, PSE eta Elkarrekin Podemosekin gehiengo osoa lortzeko akordioa erdietsiko balu.
Hauteskunde gauaren beste ezustekoa Vox alderdi ultraeskuindarraren agerpena izan da. Lehen aldiz batzarkide bat izango du Arabako Batzar Nagusietan, 4.000 arabarrek baino gehiagok botoa eman baitiote, %3ko gutxieneko langa gaindituta.
|
|
|
