Hitzarmen berria izango dute Arabako esku-hartze sozialean, hainbat hilabeteko lan gatazkaren ostean. Ekainaren 17an eta 22an eta uztailaren 14an deitutako greba egunek jarraipen zabala izan zuten, eta dagoeneko lanuzte gehiago zeuden mahai gainean, irailaren 13, 14 eta 15erako.
Hala ere, iraileko hiru greba egun horien aurretik, joan den ostiralean, aurreakordioa sinatu zuten sindikatuek eta AISA sektoreko patronalak. Horrela, hitzarmen berriak langileen eskaera nagusietako bat jasoko du: %12,9ko soldata igoera hitzarmenaren indarraldiko lau urteetan; 2021ean %0,9, 2022an %3,4, 2023an %4,5, eta 2024an %4,1.
"Negoziazioak iraun duen hilabete guzti hauetan langileek sostengatu duten borrokaren fruituak jaso ditugu. Langileon borrokak negoziazio prozesuan duen eraginaren isla da sinatu dugun aurreakordioa. Borrokak merezi du. Zorionak egin duzuen lan guztiagatik! Lortu dugu!", ospatu du LAB sindikatuak.
Gainera, sindikatu abertzaleak ohartarazi du "borrokari eutsiko" diola, "mahai negoziatzailean beharrezkoak izan diren eskakizunekin jarraituz, sektorearen erosteko ahalmena bermatuko duen eta esku-hartze sozialeko sektore osoaren lan baldintzak benetan hobetuko dituen akordio bat lortzeko".
Mila langile inguru
Araban, esku-hartze sozialeko 1.000 langile inguru daude —%75 baino gehiago emakumeak—, eta gizarteko kolektibo kalteberenak artatzen dituzte: babesgabetasun egoeran dauden adingabeak, familia kalteberak, indarkeria matxistaren biktima diren emakumeak eta gizarte bazterkeriako egoeran dauden pertsonak, baita osasun mentaleko arazoak edo adikzioak dituztenak ere.