Arabako Foru Aldundiak, Gasteizko Udalak eta Arabako Batzar Nagusiek Deportivo Alaveseko jokalariak eta teknikariak omendu dituzte astelehen honetan Artium Museoan, emakumezkoen futboleko elitera igotzea lortu ostean. Gloriosas taldeak igandean ziurtatu zuen igoera, Atletico Madril B taldearen aurkako partidan bikain aritu ostean.
Jasotako txalo zaparradaz gain, ekitaldian Ramiro Gonzalez Arabako diputatu nagusiak, Gorka Urtaran Gasteizko alkateak eta Pedro Elosegi Batzar Nagusietako presidenteak plaka oroigarri bat eman diete Mery Ortiz de Pinedo kapitainari eta Alfonso Fernandez de Troconiz Alaveseko presidenteari.
Diputatu nagusia pozik agertu da hemendik aurrera gizonezkoen eta emakumezkoen Arabako taldeak futbolaren eta saskibaloiaren elitean daudelako. "Klubarekin batera jarraituko dugu lanean, proiektuak aurrera egin dezan, Alaves erreferente are handiago bihurtzeko urratsak eman daitezen, eta horrek lurraldean eta arabarrengan eragina izan dezan", adierazi du Ramiro Gonzalezek.
