Ostegunean, apirilaren 22an, emango zaie hasiera San Prudentzio eta Estibalizko Andra Mariaren omenezko ekitaldiei. Jaiak aurten ere ezingo dira ospatu, bigarren urtez jarraian, baina zenbait ekitaldi antolatu ditu Arabako Aldundiak herrialdeko jaiak gogoratzeko.
Santa Maria katedralean hasiko dira ekitaldiak bihar, irekiera ekitaldiarekin; 19:30ean hasiko da eta ordubete iraungo du. Maite Ruiz de Austri zinemagilea izango da zeremonia maisua, iazko jaietarako pregoilari aukeratutakoa, eta harekin batera izango da Alos Quartet taldea eta Amaia Elizaran dantzaria. Ekitaldia jendeari irekia izango da, baina leku kopuru mugatua eta segurtasun neurri zorrotzak izango dira.
Sarrera doan izango da, eta eserlekuak aurrez esleituko dira, tokiak bete arte. Ateak 19:10ean irekiko dira. Sartzea lortzen ez dutenek edo katedraleraino joan nahi ez dutenek streaming bidez ikusi ahal izango dute foru aldundiaren webgunean.