Koronabirusa

Araba eremu gorrian egonkortu da eta txertaketak martxa arindu du EAEn

Txertaketa bizkortu da Lakuakoa bezalako txertodromoen aktibazioaren ostean. / ALEA

Aste Santuaren ostean, eremu gorria berrestreinatu dute Araba, Gasteiz, Bastida, Eltziego, Iruña Oka eta Legutiok. Hala ere, intzidentzia egonkortuz doa eta txertaketa bizkortzen hasi da EAEn.

Intzidentzia tasa metatuak 400 kasuak gainditu ostean, atzoko datuekin alderatuta egonkortzen ari dela dirudi. Azken 24 orduetan 93 positibo atzeman dira, baina lurraldeko intzidentzia 405ekoa da une honetan, hots, bi puntu jaitsi da. Horietatik, 79 kasu Gasteizen atzeman dira; eta hiriburuko intzidentzia 442koa da, asteazkenean baino bi puntu gehiago.

Bestalde, 5.000 biztanle baino gutxiagoko lau udalerri arabar daude eremu gorrian, intzidentzia tasa metatu altua eta beste hainbat irizpide direla eta:

  • Bastida (576)
  • Eltziego (1.642)
  • Iruña Oka (1.142)
  • Legutio (873)

5.000 biztanletik gorako beste udalerriei dagokienez, Laudio (250), Amurrio (232) eta Agurain (149) eremu horian mantentzen dira.

Neurri murriztaileak

Gaurtik aurrera, indarrean sartu dira Eusko Jaurlaritzak ezarritako neurri murriztaile berriak gure lurraldean: Arabako lurraldearen konfinamendu perimetrala ezarri da; Gasteizen eta beste lau udalerrietan, konfinamenduaz gain, beste hainbat murrizketa ezarri dira, Osasun Sailak eremu gorritik ateratzen dituen arte:

  • Konfinamendu perimetrala. Udalerri mugakidera joateko aukera dago aire zabaleko jarduera fisikoa edo erosketak egiteko.
  • Ostalaritzaren barrualdeko ordutegiak murriztea: 6:30etik 9:30era arte eta 13:00etatik 16:30era arte.
  • Espazio itxietako kirolean lau pertsonako muga; talde profesional eta federatuen entrenamendu eta lehiaketetan izan ezik. 
  • Kirol instalazioetako aldagelak eta dutxak itxita egongo dira, igerilekuetan izan ezik; horietan, edukiera %35era mugatuko da eta erabilera banakakoa izango da.
  • Indarrean zeuden gainerako neurriak mantentzen dira: besteak beste, etxeratze-agindua 22:00etatik 6:00etara, ostalaritzaren itxiera 20:00etan, jarduera kultural eta sozioekonomikoen amaiera 21:00etan eta lau pertsona arteko topaketak.

Udalerrien inguruko hurrengo ebazpena apirilaren 12an, datorren astelehenean, argitaratuko du Osasun Sailak. Orduan jakingo da berriz ere zeintzuk diren eremu gorrian dauden udalerri arabarrak.

Intzidentzia tasa metatua

Arabako udalerriak

Birusa egonkortze fasean

EAEko egoera orokorrari dagokionez, astearte honetan 9.247 test diagnostiko egin ziren; horietatik 731 positiboak izan ziren (%7,9).

Une honetan, oinarrizko birsorkuntza tasa 0,97koa da Araban, eta 1,08koa EAEn; hortaz, birusak hedatze-fasean jarraitzen du EAEn, kutsatzen den pertsona bakoitza beste pertsona bat baino gehiago kutsatzen ari delako. Baina bereziki Araban hazkundea moteltzen ari da, birsorkuntza tasa atzera egiten hasi delako eta positibo bakoitzak beste pertsona bat baino gutxiago kutsatzen ari delako. Ikusteke dago datozen egunetan joera hori mantentzen ote den.

Ospitaleen egoera

Ospitaleen egoerari dagokionez, egoera ez da ona, eta presio asistentziala ez da jaisten. Osasun Sailaren azken datuen arabera, azken 24 orduetan:

  • 66 pertsona ospitaleratu dituzte Covid-19aren ondorioz.
  • 369 lagun daude Osakidetzako solairuetan.
  • 100 pertsona ZIUetan daude, Covid-19aren ondorioz larriki gaixorik.
  • Guztira, 469 pertsona daude ingresatuta Osakidetzako ospitaletan Covid-19aren ondorioz.

Txertaketari buruzko datuak

Aste Santuan zehar, txertaketa prozesua bizkortu egin da EAEn, AstraZenecarekin biztanleria orokorraren txertaketa masiboa hasi ondoren eta, bereziki, hainbat txertodromo aktibatu ondoren; horien artean, Gasteizko Lakua pilotalekua.

Dagoeneko Espainiako hirugarren autonomia erkidegoa da (Errioxa eta Ceutaren atzetik) jarritako txertoen ehunekoari dagokionez: une honetan, jasotako txertoen %85,6 jarri ditu.

Gainera, txertatutako biztanle gehien dituen laugarren autonomia erkidegoa da: %17,1ek lehen dosia jaso du gutxienez, eta %6,1ek bigarrena ere. Hala ere, 80 urtetik gorako herritarren txertaketa motelago doa, Pfizer eta Moderna txertoen hornidura urriagoa delako. 

Erlazionatuak

Konfinamendua ezarri da Araban, Gasteizen, Bastidan, Eltziegon, Iruña Okan eta Legution

Araba

Lurraldearen eta hiriburuaren konfinamendua Aste Santuan saihestu ondoren, asteazkenetik aurrera neurri murriztaile berriak ezarriko dira Araban, G...

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide