Hiru egunez jazotako intzidentziak aztertu ondoren, EMAk ondorioztatu du ez dagoela "zantzu argirik" Europako Batasunean hogeita hamar bat herritarrek sufritutako tronboak AstraZenecaren txertoarekin lotura daudela ziurtatzeko. Are gehiago, Emer Cooke Sendagaien Europako Agentziako zuzendari exekutiboak adierazi du AstraZeneca txertoari buruzko ondorio "argi eta zientifiko batera" iritsi direla: "Txertoa osasuntsua eta eraginkorra da".
Hori dela eta, AstraZenecaren txertaketa bertan behera utzi duten Europako herrialdeei —horien artean Espainia—, "lehenbailehen berrekiteko" eskatu die, bere irizpideen arabera, "txertoaren onurek arriskuak gainditzen dituztelako".
Ebazpena zuzenean loteslea ez den arren, Espainiako Osasun Ministerioak Osasun Sistema Nazionalaren Lurralde arteko Kontseiluaren premiazko bilera deitu ditu ostegun honetan, 18:00etan, autonomia erkidego guztiekin AstraZenecaren txertaketa kanpainaren berraktibatzea adosteko.
Bilera horretan erabaki denez, lehentasunezko kolektiboetako 55 urtetik beherako herritarren txertaketari datorren asteazkenean, martxoaren 24an, berrekingo zaio. Datozen egunetan, Eusko Jaurlaritzako Osasun Sailak AstraZenecaren 37.000 dosi inguru berraktibatzeko asmoa du, eta azpimarratu du EAEn ez duela bigarren mailako ondoriorik eragin. Beste herrialde batzuetan —Frantzian, adibidez—, ordea, bihar bertan berrartuko dute AstraZenecaren txertaketa.
Hala eta guztiz ere, Sendagaien Europako Agentziak txertoen inguruko intzidentziak ikertzen jarraituko du aurrerantzean ere.
