Araba osoko 14 urte arteko 1.000 partaidetik gora izan ditu ALEA eta Bertsozale Elkarteak elkarlanean antolatutako bideo-kopla lehiaketaren lehen edizioak. Azken asteetan, bideo bidez, beraien sormena eta irudimena erakusteko aukera izan dute umeek, Gasteizko Udalaren Euskararen Astearen baitan antolatutako lehiaketan. "Ikasturte xelebrea" gai hartuta, bakarka, bikoteka, taldeka edo kuadrillan grabatu dituzte beraien buruak bertsotan.
Izugarria izan da lehiaketak lortutako arrakasta; izan ere, orotara, Arabako bazter guztietako 235 bideo baino gehiago jaso dira alea.eus webgunean.
Bertso saioa eta sari banaketa
Lehiaketari amaiera emateko, ostegun honetan, abenduaren 17an, bertso saioa antolatu da Gasteizko Jimmy Jazz aretoan, 18:00etatik aurrera. Publiko aurrean ospatuko den ikuskizunean, bertsolari onenen eskutik gauzatuko da lehiaketaren sari banaketa.
Bertan izango dira bertsotan Andoni Egaña, Aroa Arrizubieta, Oihane Perea, Peru Abarrategi eta Irati Anda bertsolariak, Uxue Diaz de Cerio gai jartzaileak proposatutakoei erantzuna emanez. Unai Mendibil eta Xabi Lasa izango dituzte laguntza lanetan.
Saioa ikusteko sarrera doakoa da, baina segurtasun neurriak bermatze aldera, ikusle kopurua mugatuta egongo da, eta beharrezkoa izango da aldez aurretik gonbidapena eskuratzea. Gonbidapenak Jimmy Jazz aretoaren webgunean eskuratu ahalko dira, agortu bitartean, abenduaren 17ra arte.
Bertaratzeko aukerarik ez duenak, saioa online ikusteko aukera ere izango du, streaming bidez ikusi ahalko baita:
Boto-ematea itxita
Azken egunetan jasotako botoak kontuan hartuz, publikoak erabakiko du Arabako bideo-koplarik onena zein izango den; hain zuzen ere, boto gehien jaso dituen bideoak irabaziko du publikoaren saria. Horrez gain, Arabako Bertsozale Elkarteko arduradunek epaimahai lana ere egingo dute, eta Arabako kuadrilla bakoitzeko koplarik onena aukeratuko dute. Sari guztien berri emango da Jimmy Jazz aretoan, ostegun honetako 18:00etatik aurrera.
Asko izango dira sarituak eta sari ugariz gozatzeko aukera izango dute: Elkar megadendak eskainitako material sortak, Bakh izotz-pistan taldean aritzeko txangoa edo Laboral Kutxaren eskutik escape room esperientziaz gozatzeko aukera, besteak beste.
