Koronabirusa

Bertan behera utzi dituzte Gasteiz, Bastida eta Guardiako ikastetxeetako eskolak

Martxoaren 23ra arte eskola guztiak eten ditu Eusko Jaurlaritzak ikastetxe, Arabako EHUko campusa, haur-eskola eta lanbide heziketako zentro guztietan; alta, langileak lanera joan beharko dira.

Koronabirus gaitzaren eraginez, goiz nahasia bizi izan dute Arabako ikastetxeek.

Goizean goiz, Bastidako bi ikastetxeak eta Gasteizko Odon de Apraiz ikastolak ixteko erabakia hartu dute, azken egunotan gertatutako kutsadura kasuen ondorioz. Bastidako kasuan, ikasleetako baten gertukoak koronabirusa duelako hartu dute neurria eta Odon de Apraiz ikastolaren kasuan berriz, itxuraz, bi irakasle dira kutsatutakoak.

Egoera horren aurrean, 12:00etan bilera deitu dute Osasun Saileko arduradunek Arabako ikastetxe guztietako zuzendariekin eta sindikatuekin. Bileran hartutako erabakiaren berri eman diete ikastetxeetako arduradunei, Gasteizko, Guardiako eta Bastidako zentroetan klaseak bertan behera utziko dituztela, gutxienez, martxoaren 23ra arte. Halere, ikastetxeak ez dituzte itxiko eta langileak lanera joan beharko dira. Arabako gainerako herrietan ez dituzte klaseak eten eta Bizkaian eta Gipuzkoan ere ez. 

Hurrengo hamalau egunetan, behintzat, etxean geratuko beharko dira ikasleak. Hauek izan dira koronabirusak behartuta estatuan itxiko dituzten lehendabiziko eskolak.

Arratsaldean, erakundeen bilera

Arratsaldean, Covid-19 koronabirusaren jarraipena egiteko erakunde arteko koordinazio bilera egingo da. Horretan parte hartuko dute Eusko Jaurlaritzako sailburuek, hiru diputatu nagusiek, foru aldundietako gizarte politiketako diputatuek, foru aldundietako kultura eta kirol diputatuek, eta Eudeleko presidenteak. Bilera 16:00etan egingo dute, eta 17:30ean Nekane Murga Osasun sailburuak agerraldia egingo du.

Erlazionatuak

Odon de Apraiz ikastetxea itxi dute

Gasteiz

Bi irakasle koronabirusarekin kutsatu direlako eman dute agindua.
Bastidako bi ikastetxeak itxi dituzte, koronabirusa geldiarazteko

Araba

Ikastetxeko ikasleetako baten gertukoak koronabirusa duelako hartu dute neurria.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide