Udan sortu zen Herri Txikiak Bat asanblada, aspaldiko "hutsunea" betetzeko. Herri txikietako gabeziek eta populazioaren zahartzeak kezkatuta, irtenbideak nahi dituzte. Hasieran bost herri bildu ziren: Buradon Gatzaga, Argantzon, Bernedo, Urizaharra eta Zanbrana. Orain Trebiñu, Korres eta Markinez ere batu dira.
Eta egutegian gorriz markatutako hitzordua iritsi zen larunbatean. Ekimen hau, ordea, ez da hemen amaitzen, izan ere, Arabako herri txikietako "gazteen arteko harremana" indartzea da haien helburua. Jaialdi honekin "aurrekari bat" finkatu nahi izan dute, "ondoren etorriko denari bidea egiten hasteko".
Goizeko hamabietan hasiera eman zioten egitarauari, umeen txokoarekin. Horren ostean, gaueko ordu txikiak arte luzatu ziren egitarau oparo batekin: pintxo solidarioa, triki-poteoa, bertso-bazkaria, Arabako herrien bingoa, herri olinpiadak, zumba, ekitaldia eta kontzertuak.
