Iruña-Veleia auzia

Eliseo Gili bi urte eta hiru hilabeteko zigorra ezarri diote

Epaileak frogatutzat eman du Gilek bere aurkikuntzekin iruzur egin zuela. / ALEA

Gasteizko Zigor Arloko 1. epaitegiak dokumentuak faltsutzeagatik eta iruzurragatik zigortu du. Ruben Cerdani urtebete eta hiru hilabeteko zigorra ezarri dio. Biek espetxea saihestuko dute.

Epaitegiak Eliseo Gil aztarnategiko zuzendari ohia eta Ruben Cerdan haren laguntzailea zigortu ditu Iruña-Veleiako enklabe erromatarrean lurperatutako grafito batzuk "ezohiko" gisa aurkezten saiatzeagatik.

Isabel Maria Diez Pardo epaileak frogatutzat eman du Gilek bere aurkikuntzekin iruzur egin zuela. Bi urte eta hiru hilabeteko zigorra ezarri dio, agiriak faltsutzeagatik eta iruzur delitu jarraitu bat egiteagatik.

Lehenengo delituagatik urtebeteko kartzela zigorra ezarri dio, eta bigarrenagatik, urtebete eta hiru hilabetekoa. Bi zigorretako batek ere ez duenez bi urteko iraupena gainditzen, ez da espetxera joango. Aldundiak 7 urte eta erdiko zigorra eskatu zuen berarentzat, eta fiskaltzak 5 urte eta erdi.

Ruben Cerdan kolaboratzaileari urtebete, hiru hilabete eta 23 eguneko espetxe zigorra ezarri dio.

Bestalde, epaileak aringarritzat jo ditu hamaika urtez luzatu den prozesuak eragindako "atzerapen bidegabeak".

Bien artean 12.490 euro ordaindu beharko dizkiote Arabako Foru Aldundiari, aztarnategiaren jabe gisa, aurkikuntzei zilegitasuna emateko asmoz sortu zituzten txosten batzuengatik.

Helegitea jartzeko aukera du defentsak. Hamaika urte igaro dira aztarnategiaren jabeak, Aldundiak, 1994 eta 2008 artean indusketaren zuzendari izan zena auzitara eraman zuenetik. Hala ere, Gilek beti aldarrikatu du errugabea dela, eta indusketaren aurkikuntzen egiazkotasunari eta salbuespenari eutsi die une oro. Bi akusatuen abokatuek absoluzioa eskatu zuten otsailean egindako epaiketan.

Epaiketa

Oraingoz, horrela amaitu da Iruña-Veleiako aztarnategitik ateratako 291 piezen ustezko faltsifikazioen auzia.

Eliseo Gil zuzendariak "ezohiko" aurkikuntza gisa aurkeztu zituen piezak 2005 eta 2006 urteen artean. 2008an, pieza horien benekotasuna aztertzeko batzorde zientifiko bat sortu zen. Batzordaren ebazpenaren harira, Arabako Foru Aldundiak aztarnategia ustiatzen zuen Lurmen enpresa kaleratu zuen, eta arduradunen aurkako salaketa jarri zuen.

Hamaika urte beranduago, 2019ko otsailaren 3an hasi zen epaiketa: 50 bat lekukok parte hartu dute 12 saiotan. Hiru akusatu zeuden epaiketaren hasieran: Eliseo Gil, Ruben Cerdan eta Oscar Escribano.

Escribano geologoak pieza bat faltsutu zuela onartu zuen lehen saioan, broma bat egiteko "Veleia" hitza pieza batean idatzi zuelako. Akusazioarekin urtebeteko espetxe zigorra adostu zuen.

Erlazionatuak

Argitu du

Erabiltzailearen aurpegia Añana Iruña Oka 1

"Argitu da, behingoz, gehienok pentsatzen genuena: ostrakak faltsuak zirela. Nahiz eta minoria batek debatea "zientifikoa" zela irudikatu nahi zuen...
Ez daitezela ausartu grafitoak suntsitzera

Erabiltzailearen aurpegia Añana Iruña Oka

"Epaiketan eskubide guztiak urratu dira. Faltsuak direla uste badute, zergatik ez diote grafitoak beste laborategi batean datatzeko baimenik eman E...
Epaiaren zain geratu da Iruña-Veleia auziaren epaiketa

Añana Iruña Oka

Eliseo Gilentzat eskatutako bost urte eta erdiko kartzela zigorrari eutsi zion atzo Fiskaltzak. Epaiketaren amaieran, akusatu nagusiak berak hitza ...

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide