Argantzongo Udalak jakitera eman duenez, Gaztela eta Leongo Juntak errekerimendu bat bidali dio —urtarrilaren 17ko datarekin—, hilabeteko epean Trebiñu Araban integratzeko prozesua biziberritzeko ekimena bertan behera uzteko exijituz; Trebiñuko Konderriko Udalak ere datozen egunetan jasotzea espero du.
Joan den abenduaren 15ean enklabeko bi udaletan onartutako akordioak integrazioa bultzatzeko hainbat ekimen jarri zituen martxan: besteak beste, integrazioa lortzeko lan-mahai bat sortzea, komunikazio kanpaina bat abiatzea eta herritarren inplikazioa bultzatzea.
Gaztela eta Leongo gobernu autonomikoaren ustez, akordioak "eragin negatiboa" du autonomia erkidegoaren interesetan. Gainera, argudiatzen du Argantzongo Udalak "ordenamendu juridikoa hautsi" eta "bere eskumena gainditu" duela.
Ostiral honetan, Argantzongo Udalaren osoko bilkurak errekerimenduari uko egin eta agindua desobeditzeko erabakia hartuko du. Udalak, gainera, berretsi egin du enklabea Arabako Lurralde Historikoan sartzeko asmoa, eta gogorarazi du Gaztela eta Leongo Estatutuak berak arautzen duela egiteko prozedura.
