Igande honetan ospatu dira Gaztela eta Leongo hauteskundeak. Emaitza orokorretan PPk irabazi du —gobernua osatzeko ultraeskuinaren babesa beharko duen arren—, baina emaitzak oso bestelakoak izan dira Trebiñun.
EAJk (Trebiñuko Konderrian) eta EH Bilduk (Argantzonen) gobernatutako bi udalerrietan (administratiboki, Burgos), PSOE izan da irabazle (%28,13), baina oso parte hartze baxuarekin; izan ere, herritarren %40 baino gutxiago joan da bozkatzera. PP bigarren alderdi bozkatuena izan da (%23,47), eta Podemosek beherakada nabarmena izan du (%18,99). Laugarren postuan Vox gelditu da (%12,72), eta bosgarrenean España Vaciada (%5,91). Azkenik, Ciudadanosek eta beste hainbat hautagaitza txikik boto gutxi batzuk lortu dituzte.
Hauteskunde autonomikoak udal hauteskundeetatik bereizita ospatu diren lehen aldian, Trebiñuko Konderrin abstentzioa %64,11koa izan da, eta Argantzonen %59,59koa: hautetsontzietara deituta zeuden 1.506 pertsonetatik, soilik 558k parte hartu dute.
Abstentzioaren emaitza historiko horiek Trebiñuk Araban integratzeko prozesua biziberritzeko duela gutxi abiatutako egitasmoarekin kointziditu du. Horrekin batera, joan den astean, 56 trebiñarrek Trebiñu Araba da! gutuna plazaratu zuten, hauteskundeekiko "interes falta" eta enklabearen "anomalia demokratikoa" ohartaraziz.
Gainera, abstentzioa hogei puntu baino gehiago igo da 2019ko hauteskundeekin alderatuta, eta orain arte inoiz ez da %50 baino altuagoa izan.
Emaitzak Trebiñuko Konderrian
- Trebiñuko Konderriko emaitzen xehetasun guztiak hemen
Emaitzak Argantzonen
- Argantzongo emaitzen xehetasun guztiak hemen
