Argantzonek estrategia bakarra exijitu du Covid-19a geldiarazteko

Argantzon, Trebiñuko barrendegia osatzen duten bi udalerrietako bat. / ASIER SARASUA

Azken asteetako nahasmenaren aurrean, "osasuna lehenestea" eta Covid-19ari aurre egiteko "estrategia bakarra" exijitu du Argantzongo Udalak. Gainera, Trebiñuko Udalarekin batera, premiazko bilera bat eskatu du bi administrazio autonomikoekin.

Trebiñuko Udalak joan den asteartean egin zuen bezala, Trebiñuko barrendegian bi administrazioen —Eusko Jaurlaritza eta Gaztela eta Leongo Junta— arteko estrategia bateratua exijitu du Argantzonek. Horretarako, osoko bilkuran mozio bat onartu dute, erakunde guztiei "osasuna lehenestea eta Covid-19aren hedatzea geldiarazteko estrategia bakarra aplikatzea" eskatuz.

Zentzu horretan, Argantzongo osoko bilkurak adostutako testuak dio "norabide zuzeneko urrats bat" izan zela azaroan emandakoa; izan ere, orduan onartutako alarma dekretuaren arabera, EAEn hartzen diren neurri berak aplikatu behar dira Trebiñuko barrendegian. Hala ere, EH Bildu eta EAJ taldeek babestu duten testuak "bide horretan sakondu" behar dela aldarrikatu du.

Hori dela eta, Argantzon eta Trebiñuko udalek premiazko bilera bat eskatu dute Eusko Jaurlaritzarekin eta Gaztela eta Leongo Juntarekin, "enklabeko biztanleen osasuna bermatzeko beharrezko neurriak hartzeko".

Trebiñuren integrazioa

Azkenik, testuak ohartarazi du azken asteetan sortutako egoerak "agerian utzi duela, beste behin ere, bere gordintasun osoarekin, Trebiñuko enklabearen existentzia eta bere iraunkortasunak dakarren irrazionaltasuna".

Hortaz, beste dei bat egin diete eragindako erakunde guztiei "auzi honetan sen ona aplikatzeko eta Trebiñu zein Argantzon udalerrien integrazio eraginkorrerantz ahalik eta azkarren aurrera egiteko beharrezkoak diren adostasunak sortzeko".

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide