Lehen elurtea larria izaten ari da Arabako Mendialdeko bizilagun ugarirentzat. Izan ere, herrien arteko bigarren mailako errepideak garbitzen dituzten traktoristek uko egin diote lan hori egiteari Arabako Foru Aldundiak lan baldintzak hobetzen ez dituen bitartean.
Egoera horren aurrean, Arabako Mendialdeko Kuadrillak eskatu die herritarrei kontu handiarekin ibiltzeko eta ibilgailuaren erabilera mugatzeko. Era berean, lan horiek egiteko prest dauden beste pertsonei dei egin die Arabako Mendialdeko Kuadrillarekin harremanetan jartzeko.
Kuadrillako presidenteak azaldu duenez, Arabako Foru Aldundiari dagoeneko helarazi dizkio errepideen mantentze eta garbiketa lanak egiten dituzten eta neguko bide zerbitzuak bermatzen dituzten langileen eskaerak. Izan ere, azken batzarrean erabaki zuten eskaera horiek helaraztea eta babestea.
Horien artean bi nabarmentzen dira: batetik, norberaren kalteen aseguruen kostuak estaltzeko formulak aztertzea, eta, bestetik, larrialdi aldietan, nahiz eta errepidera irten ez, traktoreen hortzak lotzeko eta askatzeko orduak ordaintzea.
Aste honetan bertan aldundiak erantzun du zailtasunak daudela eskaera horiei erantzuteko, eta etorkizunerako irtenbide posibleak aztertzen ari direla. Traktoristek zerbitzu hori emateari uztea erabaki zuten orduan.
